മുംബൈ: ഇന്ത്യയിലെ ഏറ്റവും കൂടുതൽ കളക്ഷൻ നേടിയ ചിത്രമെന്ന കിരീടമണിഞ്ഞുകൊണ്ട് ഇപ്പോഴും കുതിപ്പ് തുടരുകയാണ് രൺവീർ സിങ് നായകനായ ധുരന്ധർ: ദി റിവഞ്ച്. ഇന്ത്യയിൽ മാത്രം 1048.42 കോടി രൂപയാണ് ചിത്രം സ്വന്തമാക്കിയത്. ചിത്രം പ്രൊപ്പഗണ്ടാ സിനിമയാണെന്ന ആരോപണം ഉയർന്നിട്ടുണ്ടെങ്കിലും പ്രേക്ഷക പിന്തുണ തുടരുകയാണ്. ഇതിനിടെ ചിത്രവുമായി ബന്ധപ്പെട്ട് സംവിധായകൻ വിശാൽ ഭരദ്വാജ് നടത്തിയ ഒരു സോഷ്യൽ മീഡിയ ഇടപെടൽ വിവാദമായി.
ഇൻസ്റ്റാഗ്രാമിൽ “ധുരന്ധർ 2 കാണുന്നവർ നാസികളാണ്” എന്ന അർത്ഥം സൂചിപ്പിക്കുന്ന ഒരു റീൽ വിശാൽ ഭരദ്വാജ് ലൈക്ക് ചെയ്തതാണ് വിവാദത്തിന് കാരണം. ഈ റീലിന്റെ സ്ക്രീൻഷോട്ടുകൾ സോഷ്യൽ മീഡിയയിൽ വ്യാപകമായി പ്രചരിച്ചു. റീലിൽ, അഡോൾഫ് ഹിറ്റ്ലർ നയിച്ച നാസി കാലഘട്ടത്തിലെ പ്രശസ്തമായ ഒരു ചിത്രം ഉപയോഗിച്ചിരുന്നു. 1936-ൽ എടുത്ത ആ ചിത്രത്തിൽ, എല്ലാവരും നാസി സല്യൂട്ട് ചെയ്യുമ്പോൾ ഓഗസ്റ്റ് ലാൻഡ്മെസെർ മാത്രം സല്യൂട്ട് ചെയ്യാതെ നിൽക്കുന്ന ദൃശ്യമാണ് ഉൾപ്പെടുത്തിയിരുന്നത്. ഈ സംഭവത്തെ തുടർന്ന് സോഷ്യൽ മീഡിയയിൽ വൻ ചര്ച്ചയാണ് നടക്കുന്നത്.
