ഇടുക്കി: പെൺകുട്ടിയെ പീഡിപ്പിക്കാൻ ശ്രമിച്ച കേസിൽ പള്ളി വികാരി അറസ്റ്റിൽ. പാലൂർക്കാവ് സിഎസ്ഐ പള്ളിയിലെ വികാരിയും കോട്ടയം വെള്ളൂർ സ്വദേശിയുമായ സന്തോഷിനെയാണ് പെരുവന്താനം പോലീസ് പിടികൂടിയത്. ഫെബ്രുവരി ഒൻപതിനാണ് സംഭവം നടന്നത്.
പള്ളിമേടയിൽ വെച്ചാണ് പീഡനശ്രമം ഉണ്ടായതെന്ന് പരാതിയിൽ പറയുന്നു. കൗൺസിലിങിനായി എത്തിയ പെൺകുട്ടിയോട് ഇയാൾ മോശമായി പെരുമാറുകയായിരുന്നു. വിവരം പെൺകുട്ടി ഉടൻ തന്നെ വീട്ടുകാരെ അറിയിക്കുകയും തുടർന്ന് പെരുവന്താനം പോലീസിൽ പരാതി നൽകുകയുമായിരുന്നു.
പരാതി ഉയർന്നതോടെ പുരോഹിതൻ ഒളിവിൽ പോയെങ്കിലും പെരുവന്താനം സി.ഐക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പോലീസ് സംഘം വേളാങ്കണ്ണിയിൽ എത്തി പ്രതിയെ പിടികൂടി. പ്രതിയെ നാട്ടിലെത്തിച്ച് നടപടികൾ പൂർത്തിയാക്കി കോടതിയിൽ ഹാജരാക്കി റിമാൻഡ് ചെയ്തു.
