പാലക്കാട്: വടക്കഞ്ചേരി മലയോരത്തിന്റെ നെഞ്ചിൽ പച്ചപ്പിന്റെ ശ്വാസം നിറച്ച് നിൽക്കുന്ന വാവുമല, ഒരു പൈതൃക ടൂറിസം കേന്ദ്രമായി മാറാനുള്ള പ്രതീക്ഷയിലാണ്. കോടികൾ ചെലവഴിച്ച് സംസ്ഥാന സർക്കാർ രൂപകൽപ്പന ചെയ്യുന്ന പരിസ്ഥിതി സൗഹൃദ ടൂറിസം പദ്ധതികൾ, ഈ പ്രദേശത്തെ പ്രകൃതിയെയും സംസ്കാരത്തെയും സംരക്ഷിക്കുമെന്ന പ്രതീക്ഷയിലാണ് നാട്ടുകാർ.

എന്നാൽ ആ സ്വപ്നങ്ങളുടെ അതിരിൽ, പാറ പൊട്ടുന്ന ശബ്ദം ഇന്ന് ആശങ്കയുടെ മുഴക്കമായി മാറുകയാണ്. വാവുമല ടൂറിസം പദ്ധതിപ്രദേശത്തിന് തൊട്ടടുത്ത്, ചെല്ലിപ്പറമ്പിലെ ചൂരക്കോട്ടുകുളമ്പ് ക്വാറിയിൽ നടക്കുന്ന ശക്തമായ പാറപൊട്ടിക്കൽ പ്രവർത്തനങ്ങൾ, ഈ മലയുടെ സമാധാനം തകർക്കുന്നതായി പ്രദേശവാസികൾ പറയുന്നു.

പാറപൊട്ടുമ്പോൾ ഉയരുന്ന ഉഗ്രസ്ഫോടനങ്ങൾ പ്രകൃതിയുടെ മൗനത്തെയും മനുഷ്യരുടെ മനസ്സിനെയും ഒരുപോലെ ഭീതിയിലാഴ്ത്തുന്നു.
ക്വാറിയുടെ വിറയലിൽ സമീപത്തെ വീടുകളുടെ ചുമരുകൾക്ക് വിള്ളലുകൾ വീണു. മലവഴികളിലൂടെ വളഞ്ഞോടുന്ന റോഡുകൾ തളർന്നു. പച്ചപ്പിലേക്ക് ഒഴുകേണ്ട കാറ്റ്, ഇന്ന് പൊടിപടലങ്ങളുമായി വീടുകളിലേക്കാണ് കടന്നുവരുന്നത്. പക്ഷികളുടെ ചിറകടി കുറഞ്ഞു; മലയുടെ ശ്വാസം മുട്ടുന്നതുപോലെയാണ് നാട്ടുകാർ അനുഭവിക്കുന്നത്.

പരിസ്ഥിതി ടൂറിസം എന്ന ആശയം പ്രകൃതിയെ കീറിമുറിക്കാതെ അനുഭവിക്കലാണ്. വാവുമല പദ്ധതിയിലൂടെ നടപ്പാതകൾ, കാഴ്ചപ്പാടുകൾ, പ്രാദേശിക സംസ്കാരത്തിന്റെ അവതരണം, ഉത്തരവാദിത്ത ടൂറിസം എന്നിവയാണ് സർക്കാർ ലക്ഷ്യമിടുന്നത്. എന്നാൽ ടൂറിസം കേന്ദ്രത്തിലേക്കുള്ള വഴിക്ക് വെറും ഒരു മീറ്റർ അകലെയായി നടക്കുന്ന പാറപൊട്ടിക്കൽ, ഈ ആശയത്തിന്റെ ആത്മാവിനെയാണ് ചോദ്യം ചെയ്യുന്നത്.

15 മുതൽ 35 മീറ്റർ വരെ ആഴത്തിൽ പാറ മുറിക്കപ്പെടുമ്പോൾ, മലയുടെ അസ്ഥിവാരം തന്നെ ദുര്‍ബലമാകുന്നതായി പരിസ്ഥിതി പ്രവർത്തകർ മുന്നറിയിപ്പ് നൽകുന്നു. ഈ പ്രദേശം ഒരു ടൂറിസം കേന്ദ്രം മാത്രമല്ല, കുടിവെള്ള സ്രോതസുകളും ചെറു ജലധാരകളും ജീവജാല വൈവിധ്യവും അടങ്ങിയ സമവായ ഭൂപ്രദേശമാണെന്ന് അവർ ചൂണ്ടിക്കാട്ടുന്നു. പ്രതിഷേധത്തിന്റെ ശബ്ദം ഇന്ന് ക്വാറി കവാടത്തിൽ മാത്രം ഒതുങ്ങുന്നില്ല. വീട്ടമ്മമാരും കുട്ടികളും വയോധികരും ഉൾപ്പെടെ നാട്ടുകാർ, ജില്ലാ കലക്ടർക്കും ജിയോളജി വകുപ്പിനും തഹസിൽദാറിനും പരാതി നൽകി കഴിഞ്ഞു. എന്നാൽ ‘അന്വേഷിക്കും’ എന്ന മറുപടി മാത്രമാണ് ഇതുവരെ ലഭിച്ചതെന്ന് അവർ പറയുന്നു.

വാവുമലയുടെ മുകളിലേക്ക് ഉയരേണ്ടത് കാഴ്ചപ്പാടുകളായിരിക്കണം; പൊടിമേഘങ്ങളല്ല. ഈ മലയിൽ കേൾക്കേണ്ടത് സഞ്ചാരികളുടെ ചിരിയും കാറ്റിന്റെ ശബ്ദവുമാകണം; സ്ഫോടനങ്ങളുടെ മുഴക്കമല്ല.
പൈതൃക ടൂറിസം എന്ന പേരിൽ പ്രകൃതിയെ ആഘോഷിക്കണോ, അതിന്റെ നെഞ്ചിൽ പാറവെട്ട് തുടരാനോ എന്ന ചോദ്യമാണ് ഇന്ന് വാവുമല നമ്മോട് ചോദിക്കുന്നത്.
ക്വാറി പ്രവർത്തനം ഉടൻ നിർത്തിവയ്ക്കാൻ നടപടി ഉണ്ടായില്ലെങ്കിൽ സമരം ശക്തമാക്കുമെന്ന മുന്നറിയിപ്പാണ് നാട്ടുകാർ നൽകുന്നത്.
മലയുടെ ഭാവിക്കായി, മനുഷ്യരുടെ സുരക്ഷക്കായി, പരിസ്ഥിതി ടൂറിസത്തിന്റെ ആത്മാവിനായി സർക്കാർ ഉണരുമെന്ന് പ്രകൃതി സ്നേഹികളും പ്രതീക്ഷിക്കുന്നു.