റിയാദ്: പശ്ചിമേഷ്യയിലെ സംഘർഷ സാഹചര്യങ്ങൾക്കിടെ സൗദി അറേബ്യ, തുർക്കി, പാകിസ്ഥാൻ എന്നീ രാജ്യങ്ങൾ നിർണായക പ്രതിരോധ കരാറിൽ ഒപ്പുവെച്ചു. ‘മക്ക സംയുക്ത പ്രതിരോധ കരാർ’ എന്ന പേരിലുള്ള കരാറിലാണ് മൂന്ന് രാജ്യങ്ങളും ധാരണയിലെത്തിയത്.
വെള്ളിയാഴ്ച സൗദിയിൽ നടന്ന യോഗത്തിൽ സൗദി കിരീടാവകാശി മുഹമ്മദ് ബിൻ സൽമാൻ രാജകുമാരൻ, തുർക്കി പ്രസിഡന്റ് റജബ് തയ്യിപ് എർദോഗാൻ, പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് എന്നിവർ കരാറിൽ ഒപ്പുവെച്ചു.
പ്രതിരോധ മേഖലയിലെ സഹകരണം ശക്തിപ്പെടുത്തുന്നതാണ് പുതിയ കരാർ ലക്ഷ്യമിടുന്നത്. കരാർ പ്രകാരം മൂന്ന് രാജ്യങ്ങളിൽ ഏതെങ്കിലും ഒന്നിന് നേരെയുണ്ടാകുന്ന ആക്രമണം മൂന്ന് രാജ്യങ്ങൾക്കും നേരെയുള്ള ആക്രമണമായി കണക്കാക്കുമെന്നാണ് റിപ്പോർട്ടുകൾ.
സംഭവവികാസങ്ങൾ ഇന്ത്യ സസൂക്ഷ്മം നിരീക്ഷിച്ചുവരികയാണെന്ന് കേന്ദ്രസർക്കാർ അറിയിച്ചു. സൗദി-പാകിസ്ഥാൻ-തുർക്കി പ്രതിരോധ സഹകരണവുമായി ബന്ധപ്പെട്ട വിവരങ്ങൾ വിലയിരുത്തുകയാണെന്നും ഇന്ത്യ വ്യക്തമാക്കി.
പശ്ചിമേഷ്യയിൽ സുരക്ഷാ ആശങ്കകൾ വർധിക്കുന്ന സാഹചര്യത്തിലാണ് സൗദി പുതിയ പ്രതിരോധ പങ്കാളിത്തത്തിലേക്ക് നീങ്ങുന്നത്. ആണവശക്തിയായ പാകിസ്ഥാനുമായും നാറ്റോയിലെ പ്രധാന സൈനിക ശക്തിയായ തുർക്കിയുമായുമുള്ള സഹകരണം സൗദിയുടെ പ്രതിരോധ ശേഷി വർധിപ്പിക്കുമെന്നാണ് വിലയിരുത്തൽ.
ഇറാൻ, ഹൂതി വിമതർ എന്നിവരിൽ നിന്നുള്ള സുരക്ഷാ വെല്ലുവിളികൾ നിലനിൽക്കുന്ന സാഹചര്യത്തിലാണ് പുതിയ കരാർ ശ്രദ്ധ നേടുന്നത്. സംയുക്ത സൈനികാഭ്യാസങ്ങൾ, പരിശീലന പരിപാടികൾ, പ്രതിരോധ സാങ്കേതികവിദ്യ കൈമാറ്റം, രഹസ്യാന്വേഷണ വിവരങ്ങളുടെ പങ്കുവെക്കൽ തുടങ്ങിയ മേഖലകളിലും സഹകരണം ലക്ഷ്യമിടുന്നതായാണ് റിപ്പോർട്ടുകൾ.
