തിരുവനന്തപുരം: ഐഎഎസ് ഉദ്യോഗസ്ഥൻ ശ്രീറാം വെങ്കിട്ടരാമന് പുതിയ ചുമതല. കേരള സ്റ്റേറ്റ് കാഷ്യു ഡെവലപ്മെന്റ് കോർപ്പറേഷൻ (കാഷ്യു കോർപ്പറേഷൻ) എംഡിയായാണ് പുതിയ നിയമനം. ഇതുസംബന്ധിച്ച ഉത്തരവ് ഇന്ന് പുറത്തിറങ്ങും.
കശുവണ്ടി വ്യവസായത്തെ നിലനിർത്തുകയാണ് സർക്കാരിന്റെ ലക്ഷ്യമെന്ന് മന്ത്രി ഷിബു ബേബി ജോൺ പറഞ്ഞു. കശുവണ്ടി മേഖല ഉടൻ വലിയ വളർച്ച കൈവരിക്കുമെന്ന പ്രതീക്ഷ തനിക്കില്ലെന്നും മന്ത്രി വ്യക്തമാക്കി. ഇടനിലക്കാരുടെ ജീവിതനിലവാരം ഉയർത്തുകയല്ല, തൊഴിലാളികൾക്ക് ഗുണം ലഭിക്കുന്ന തരത്തിൽ മേഖലയിൽ മാറ്റങ്ങൾ കൊണ്ടുവരികയാണ് ലക്ഷ്യമെന്നും ഷിബു ബേബി ജോൺ പറഞ്ഞു.
സെപ്റ്റംബറിൽ ഐഎഎസ് ഉദ്യോഗസ്ഥർക്കുണ്ടായ സ്ഥലംമാറ്റത്തിന്റെ ഭാഗമായി ശ്രീറാം വെങ്കിട്ടരാമനെ കൃഷി വകുപ്പിൽ നിന്ന് വനംവകുപ്പ് ജോയിന്റ് സെക്രട്ടറിയായി നിയമിച്ചിരുന്നു. ഈ ചുമതല ഏറ്റെടുത്ത് ഒരു മാസം തികയും മുൻപാണ് കാഷ്യു കോർപ്പറേഷൻ എംഡിയായി പുതിയ നിയമനം ലഭിക്കുന്നത്.
