തിരുവനന്തപുരം: വിവാദ പരാമര്ശത്തില് വിശദീകരണവുമായി മന്ത്രി സജി ചെറിയാന്. പ്രസ്താവന വളച്ചൊടിച്ചെന്നും അതിന്റെ പേരില് തെറ്റിദ്ധരിപ്പിക്കാനാണ് ശ്രമമെന്നും സജി ചെറിയാന് പറഞ്ഞു.
താന് പറഞ്ഞത് യാഥാര്ത്ഥ്യമാണ്. മുസ്ലിം മേഖലയില് ലീഗും ഹിന്ദു മേഖലയില് ബിജെപിയും നയിക്കുന്നു. ഈ സാഹചര്യം ഉണ്ടാകരുതെന്നാണ് താന് ഉദ്ദേശിച്ചതെന്നും അദ്ദേഹം പറഞ്ഞു.
ആര്എസ്എസ് ഉയര്ത്തുന്ന വര്ഗീയത പ്രതിരോധിക്കേണ്ടതുണ്ട്. ആര്എസ്എസുകാര് ഉയര്ത്തുന്ന വര്ഗീയതയെ ന്യൂനപക്ഷ വര്ഗീയത കൊണ്ട് നേരിടാന് കഴിയില്ല. അതിന് കേരളത്തിലെ ഇടതുപക്ഷത്തെ ശക്തിപ്പെടുത്തണം.
കാസര്കോട് മുനിസിപ്പാലിറ്റിയില് 39 സീറ്റ് ഉണ്ട്. മതേതരത്വം പറഞ്ഞ് ഞങ്ങള്ക്ക് കിട്ടിയത് ഒരു സീറ്റാണ്. കോണ്ഗ്രസിന് 2 സീറ്റ് ലഭിച്ചു. വര്ഗീയത പറഞ്ഞ ബിജെപിക്ക് 12 സീറ്റ് കിട്ടി. ലീഗില് നിന്ന് 22 പേര് ജയിച്ചു.
അവരുടെ പേരുകള് വായിക്കാന് മാത്രമേ താന് പറഞ്ഞിട്ടുള്ളുവെന്നും ഈ അവസ്ഥ കേരളത്തില് മറ്റൊരിടത്തും വരരുത് എന്ന് മാത്രമേ താന് ആഗ്രഹിച്ചുള്ളൂവെന്നും മന്ത്രി മാധ്യമങ്ങളോട് പറഞ്ഞു.
