ദില്ലി: ധൈര്യത്തോടെയും സത്യസന്ധതയോടെയും പ്രവർത്തിക്കുന്ന ജഡ്ജിമാർക്ക് പിന്തുണ നൽകുന്നതിൽ സുപ്രീം കോടതി കൊളീജിയം മുമ്പ് പലപ്പോഴും പരാജയപ്പെട്ടിട്ടുണ്ടെന്ന് ജസ്റ്റിസ് ദീപങ്കർ ദത്ത വിമർശിച്ചു. ഇത്തരം അനുഭവങ്ങൾ ജഡ്ജിമാരെ ധാർമ്മികതയ്ക്ക് മുൻഗണന നൽകുന്നതിൽ നിന്ന് പിന്തിരിപ്പിക്കുന്നതായും അദ്ദേഹം മുന്നറിയിപ്പ് നൽകി. മൂല്യങ്ങൾക്ക് മുൻതൂക്കം നൽകുന്ന ജഡ്ജിമാരുടെ എണ്ണം കുറയുന്നതായും ദത്ത ചൂണ്ടിക്കാട്ടി. കൂടാതെ, സുപ്രീം കോടതി ജഡ്ജിമാരുടെ എണ്ണം 34ൽ നിന്ന് 40 ആയി വർധിപ്പിക്കണമെന്നും അദ്ദേഹം ആവശ്യപ്പെട്ടു.
ജഡ്ജിമാർക്കെതിരെ ഉയരുന്ന വിമർശനങ്ങൾക്കിടയിൽ, വലിയ നന്മയ്ക്കായി തിരിച്ചടി ഏറ്റെടുക്കാനുള്ള ധൈര്യവും ബോധ്യവും പലർക്കും ഉണ്ടായിരുന്നുവെങ്കിലും, ഇന്നത്തെ സാഹചര്യത്തിൽ കരിയർ വളർച്ചയെക്കാൾ ധാർമ്മികത തിരഞ്ഞെടുക്കാൻ എത്ര പേർ തയ്യാറാകും എന്ന സംശയവും ദത്ത ഉയർത്തി. “പറയുന്ന കാര്യങ്ങൾ പ്രാവർത്തികമാക്കാനുള്ള സത്യസന്ധത ഇന്നത്തെ ജഡ്ജിമാർക്കുണ്ടോ?” എന്ന ചോദ്യവും അദ്ദേഹം ഉന്നയിച്ചു.
‘റീഇമാജിനിംഗ് ജുഡീഷ്യൽ ഗവേണൻസ്’ വിഷയത്തിൽ സുപ്രീം കോടതി ബാർ അസോസിയേഷൻ സംഘടിപ്പിച്ച ആദ്യ ദേശീയ സമ്മേളനത്തിൽ സംസാരിക്കവെയാണ് ഈ പരാമർശങ്ങൾ. നീതിപാലനത്തിന്റെ പേരിൽ ജഡ്ജിമാർ തന്നെ ഇരകളാകാതിരിക്കാനുള്ള സംരക്ഷണം നൽകുന്നതിൽ വീഴ്ച സംഭവിച്ച സംഭവങ്ങൾ മുൻകാലങ്ങളിൽ ഉണ്ടായിട്ടുണ്ടെന്നും അദ്ദേഹം കൂട്ടിച്ചേർത്തു.
കൊളീജിയം അംഗങ്ങൾ സഹജഡ്ജിമാരെ സംരക്ഷിക്കണമെന്ന് വേദിയിൽ സന്നിഹിതയായിരുന്ന ജസ്റ്റിസ് ബി.വി. നാഗരത്നയോട് ജസ്റ്റിസ് ദത്ത അഭ്യർത്ഥിച്ചു. സ്ഥാനക്കയറ്റം നഷ്ടപ്പെടുകയോ അധികാരികളെ അസ്വസ്ഥരാക്കുകയോ ചെയ്താലും ശരിയായ തീരുമാനങ്ങൾ എടുക്കാൻ ജഡ്ജിമാർ മടിക്കരുതെന്ന് നാഗരത്ന പറഞ്ഞു.
ജഡ്ജിമാർ അവധി ദിവസങ്ങളിൽ ജോലി ചെയ്യില്ലെന്ന വിമർശനങ്ങൾക്കും ഇരുവരും മറുപടി നൽകി. രാവിലെ മുതൽ വൈകുന്നേരം വരെ കേസുകൾ പരിഗണിക്കുന്ന ജഡ്ജിമാർ, അവധി ദിവസങ്ങൾ വിധിന്യായങ്ങൾ തയ്യാറാക്കാൻ ഉപയോഗിക്കുന്നതാണെന്ന് അവർ വ്യക്തമാക്കി. ജഡ്ജിമാരുടെ പ്രവർത്തന രീതിയെക്കുറിച്ച് അറിവില്ലാത്തവരാണ് ഇത്തരം വിമർശനങ്ങൾ ഉന്നയിക്കുന്നതെന്നും ദത്ത കൂട്ടിച്ചേർത്തു.
