കൊച്ചി: ഊട്ടിയില്നിന്ന് കാര് കടത്തിക്കൊണ്ടു വരുന്നു എന്ന സംശയത്തില് കണ്ടെയ്നര് ലോറി പിടികൂടി പൊലീസ്. രാജസ്ഥാന് റജിസ്ട്രേഷനുള്ള കണ്ടെയ്നറാണ് പനങ്ങാട് പൊലീസ് പിടികൂടിയിരിക്കുന്നത്. ഇതിലുണ്ടാിരുന്ന 3 രാജസ്ഥാന് സ്വദേശികളെ കസ്റ്റഡിയിലെടുത്തു. രഹസ്യവിവരത്തിന്റെ അടിസ്ഥാനത്തിലാണ് നെട്ടൂരില് വച്ച് ലോറി പിടികൂടിയത്.
എന്നാല് പരിശോധനയില് കാര് കണ്ടെത്താനായില്ല. കണ്ടെയ്നറില് എസിയും അനുബന്ധ ഉപകരണങ്ങളുമാണ് ഉണ്ടായിരുന്നത്. എന്നാല് വിശദമായ പരിശോധനയില് ലോറിയില്നിന്ന് ഗ്യാസ് കട്ടര് കണ്ടെത്തി. കാര് മോഷ്ടിച്ച് കടത്തിക്കൊണ്ടു വരുന്നു എന്ന് ലോറിയുടെ നമ്പര് അടക്കം പൊലീസിന് രഹസ്യവിവരം ലഭിക്കുകയായിരുന്നു. എന്നാല് ഒരു കാറാണോ ഒന്നിലധികം കാറുകള് കടത്തിയിട്ടുണ്ടോ എന്ന കാര്യത്തില് വ്യക്തതയില്ല. കടത്തിക്കൊണ്ടു വന്ന കാര് മറ്റെവിടെയെങ്കിലും ഇറക്കിയോ എന്നറിയാന് കസ്റ്റഡിയിലുള്ളവരെ പൊലീസ് ചോദ്യം ചെയ്തുകൊണ്ടിരിക്കുകയാണ്.
ലോറിയിലുണ്ടായിരുന്നത് 3 രാജസ്ഥാന് സ്വദേശികളാണ്. ഇവരെ പൊലീസ് കസ്റ്റഡിയിലെടുത്തു, തുടര്ന്ന് പനങ്ങാട് സ്റ്റേഷനിലെത്തിച്ച് ചോദ്യം ചെയ്യുന്നതിനിടെ് കൂട്ടത്തിലൊരാള് ശുചിമുറിയില് പോവുകയും ഇവിടുത്തെ ജനാല ഇളക്കി രക്ഷപ്പെടുകയും ചെയ്തിരുന്നു. പിന്നീട് ഇയാളെ പിടികൂടിയതായാണ് വിവരം. ഇക്കാര്യത്തില് കൂടുതല് വിവരങ്ങള് പുറത്തുവിട്ടിട്ടില്ല.
