കൊൽക്കത്ത: പശ്ചിമ ബംഗാളിലെ സന്ദേശ്ഖലിയിൽ അമ്മയെയും മകളെയും കൊലപ്പെടുത്തി മൃതദേഹം കത്തിച്ച നിലയിൽ കണ്ടെത്തി. ശനിയാഴ്ച രാത്രിയോടെയാണ് നാടിനെ നടുക്കിയ സംഭവം പുറത്തറിയുന്നത്.
വീട്ടിനുള്ളിലെ പെട്ടിയിൽ പകുതി കത്തിക്കരിഞ്ഞ നിലയിലാണ് ഇരുവരുടെയും മൃതദേഹങ്ങൾ കണ്ടെത്തിയത്. കൊലപാതകത്തിന് ശേഷം തെളിവുകൾ നശിപ്പിക്കുന്നതിനായി മൃതദേഹങ്ങൾ പെട്ടിയിലാക്കി തീകൊളുത്തിയതായാണ് പോലീസ് പ്രാഥമിക നിഗമനം.
ഞായറാഴ്ച രാവിലെ സ്ഥലത്തെത്തിയ പോലീസ് മൃതദേഹങ്ങൾ പുറത്തെടുത്ത് ഇൻക്വസ്റ്റ് നടപടികൾ പൂർത്തിയാക്കി. മൃതദേഹങ്ങൾ പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.
സംഭവത്തിന് പിന്നാലെ കുടുംബത്തിലെ യുവതിയുടെ ഭർത്താവിനെ കാണാതായിട്ടുണ്ട്. ഇയാളെ കണ്ടെത്താൻ പോലീസ് അന്വേഷണം ശക്തമാക്കിയിട്ടുണ്ട്. കുടുംബകലഹമോ മറ്റ് കാരണങ്ങളോ കൊലപാതകത്തിന് പിന്നിലുണ്ടോയെന്ന് പോലീസ് പരിശോധിച്ചു വരികയാണ്.
