ന്യൂഡൽഹി: മുഖ്യമന്ത്രി വി.ഡി. സതീശൻ ഡൽഹിയിലെത്തി മുതിർന്ന കോൺഗ്രസ് നേതാക്കളുമായി കൂടിക്കാഴ്ച നടത്തി. രാഹുൽ ഗാന്ധി, സോണിയ ഗാന്ധി, പ്രിയങ്ക ഗാന്ധി എന്നിവരുമായി അദ്ദേഹം പ്രത്യേകം കൂടിക്കാഴ്ച നടത്തി. കൂടിക്കാഴ്ചയ്ക്ക് മുൻപ് എഐസിസി ജനറൽ സെക്രട്ടറി കെ.സി. വേണുഗോപാലിനെയും കോൺഗ്രസ് അധ്യക്ഷൻ മല്ലികാർജുൻ ഖർഗെയെയും സതീശൻ സന്ദർശിച്ചിരുന്നു. രാവിലെ 9 മണിയോടെയാണ് കെ.സി. വേണുഗോപാലുമായുള്ള കൂടിക്കാഴ്ച ആരംഭിച്ചത്.

ഖർഗെയുമായുള്ള കൂടിക്കാഴ്ചയിൽ സംഘടനാ വിഷയങ്ങൾ ഉൾപ്പെടെ ചർച്ചയായതായാണ് വിവരം. തുടർന്ന് രാഹുൽ ഗാന്ധി, സോണിയ ഗാന്ധി, പ്രിയങ്ക ഗാന്ധി എന്നിവരുമായി നടത്തിയ ചർച്ചയിൽ തിരഞ്ഞെടുപ്പിൽ നൽകിയ പിന്തുണയ്ക്ക് നന്ദി അറിയിച്ചതായും റിപ്പോർട്ടുകൾ പറയുന്നു. ഇതിനിടെ പ്രധാനമന്ത്രി നരേന്ദ്ര മോദിയുമായി മുഖ്യമന്ത്രി വി.ഡി. സതീശൻ ചൊവ്വാഴ്ച കൂടിക്കാഴ്ച നടത്തുമെന്നും സൂചനയുണ്ട്. രാവിലെ 9 മണിയോടെയായിരിക്കും കൂടിക്കാഴ്ച നടക്കുക എന്നാണ് പുറത്തുവരുന്ന വിവരം.