കൊച്ചി: അമേരിക്കൻ പ്രസിഡന്റ് ഡോണാൾഡ് ട്രംപിന്റെ മരുമകൻ മൈക്കിൾ ബൂലോസ് കൊച്ചിയിലെത്തി. മുഖ്യമന്ത്രി വി.ഡി. സതീശനുമായി അദ്ദേഹം കൂടിക്കാഴ്ച നടത്തി. വ്യവസായ മന്ത്രി പി.കെ. കുഞ്ഞാലിക്കുട്ടിയും കൂടിക്കാഴ്ചയിൽ പങ്കെടുത്തു.
ട്രംപിന്റെ മകൾ ടിഫാനി ട്രംപിന്റെ ഭർത്താവാണ് മൈക്കിൾ ബൂലോസ്. രാവിലെ ചാർട്ടേഡ് വിമാനത്തിലാണ് അദ്ദേഹം നെടുമ്പാശേരി വിമാനത്താവളത്തിലെത്തിയത്. അമേരിക്കൻ അംബാസഡറും ചെന്നൈയിലെ അമേരിക്കൻ കോൺസുലേറ്റിലെ ഉദ്യോഗസ്ഥരും അദ്ദേഹത്തോടൊപ്പമുണ്ടായിരുന്നു.
കൊച്ചിയിലെ പഞ്ചനക്ഷത്ര ഹോട്ടലിൽ വെച്ചാണ് മുഖ്യമന്ത്രിയുമായുള്ള കൂടിക്കാഴ്ച നടന്നത്. ചാർട്ടേഡ് വിമാനത്തിലെത്തിയ സംഘം ഇന്ന് തന്നെ മടങ്ങുമെന്നാണ് വിവരം. മൈക്കിൾ ബൂലോസ് ഫോർട്ട് കൊച്ചിയും ജൂത സിനഗോഗും സന്ദർശിച്ചേക്കും. ആലപ്പുഴയിൽ ഹൗസ് ബോട്ട് യാത്ര നടത്താനും സാധ്യതയുണ്ട്. എന്നാൽ കാലാവസ്ഥ അനുകൂലമല്ലാത്തതിനാൽ ഇക്കാര്യത്തിൽ സ്ഥിരീകരണമില്ല.
സംസ്ഥാന സർക്കാരിന്റെ അതിഥിയായാണ് മൈക്കിൾ ബൂലോസ് കേരളത്തിലെത്തിയത്. സന്ദർശനത്തിന് പിന്നിലെ മറ്റ് കാര്യങ്ങൾ സംബന്ധിച്ച് വ്യക്തതയില്ല. സുരക്ഷാ കാരണങ്ങളാലാണ് സന്ദർശന വിവരം നേരത്തെ പുറത്തുവിടാതിരുന്നതെന്നാണ് സൂചന. മുഖ്യമന്ത്രിയുമായും വ്യവസായ മന്ത്രിയുമായും നടത്തിയ കൂടിക്കാഴ്ചയുടെ വിശദാംശങ്ങൾ ഇതുവരെ സർക്കാർ പുറത്തുവിട്ടിട്ടില്ല. ഇതുസംബന്ധിച്ച് വിശദമായ വാർത്താക്കുറിപ്പ് പിന്നീട് പുറത്തിറക്കിയേക്കും.
