തിരുവനന്തപുരം: യൂണിവേഴ്സിറ്റി ഹോസ്റ്റലിന് മുന്നിലുണ്ടായ എസ്എഫ്ഐ-യൂത്ത് കോൺഗ്രസ് സംഘർഷത്തിൽ ഒരാൾ അറസ്റ്റിൽ. യൂത്ത് കോൺഗ്രസ് പ്രവർത്തകൻ ഫൈദറെയാണ് പൊലീസ് അറസ്റ്റ് ചെയ്തത്. സംഭവവുമായി ബന്ധപ്പെട്ട് എസ്എഫ്ഐ, യൂത്ത് കോൺഗ്രസ് പ്രവർത്തകർക്കെതിരെ പൊലീസ് കേസെടുത്തിരുന്നു. കേസിലെ ആദ്യ അറസ്റ്റാണിത്.
ബുധനാഴ്ച രാത്രിയായിരുന്നു യൂണിവേഴ്സിറ്റി ഹോസ്റ്റലിന് മുന്നിൽ സംഘർഷമുണ്ടായത്. മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ പുറത്താക്കണമെന്ന് ആവശ്യപ്പെട്ട് യൂത്ത് കോൺഗ്രസ് നടത്തിയ റസിസ്റ്റൻസ് മാർച്ചിനിടെയായിരുന്നു ഏറ്റുമുട്ടൽ.
മാർച്ച് യൂണിവേഴ്സിറ്റി ഹോസ്റ്റലിന് മുന്നിലെത്തിയതോടെയാണ് സംഘർഷം ആരംഭിച്ചത്. ഹോസ്റ്റലിൽ നിന്ന് കല്ലും കുപ്പിയും എറിഞ്ഞതാണ് സംഘർഷത്തിന് കാരണമെന്നാണ് യൂത്ത് കോൺഗ്രസിന്റെ ആരോപണം. എന്നാൽ യൂത്ത് കോൺഗ്രസ് പ്രവർത്തകരാണ് പ്രകോപനം സൃഷ്ടിച്ചതെന്നാണ് ഹോസ്റ്റൽ വിദ്യാർഥികളുടെ ആരോപണം. സമരക്കാർ ഹോസ്റ്റലിലേക്ക് തീപ്പന്തം ഉൾപ്പെടെ എറിഞ്ഞതോടെയാണ് സംഘർഷം ആരംഭിച്ചതെന്നും വിദ്യാർഥികൾ ആരോപിക്കുന്നു.
കാമ്പസിലേക്ക് കടന്ന യൂത്ത് കോൺഗ്രസ് പ്രവർത്തകർ കൊടിതോരണങ്ങളും ബോർഡുകളും നശിപ്പിച്ചതായും ആരോപണമുണ്ട്. പിന്നാലെ ഇരുവിഭാഗവും കല്ലേറിലും ഏറ്റുമുട്ടലിലും ഏർപ്പെട്ടു. അരമണിക്കൂറോളം സംഘർഷാവസ്ഥ തുടർന്നു.
സംഭവത്തിൽ മ്യൂസിയം പൊലീസ് രണ്ട് കേസുകളാണ് രജിസ്റ്റർ ചെയ്തത്. എസ്എഫ്ഐ, യൂത്ത് കോൺഗ്രസ് പ്രവർത്തകർക്കെതിരെ ജാമ്യമില്ലാ വകുപ്പുകൾ ഉൾപ്പെടെയാണ് കേസെടുത്തത്. കേസിന്റെ തുടർനടപടികളുടെ ഭാഗമായി കൂടുതൽ അറസ്റ്റ് ഉണ്ടാകുമോയെന്ന് പൊലീസ് പരിശോധിക്കുകയാണ്.
തിരുവനന്തപുരത്തെ സംഘർഷത്തിന് പിന്നാലെ സംസ്ഥാനത്തിന്റെ വിവിധ ഭാഗങ്ങളിലും പ്രതിഷേധങ്ങൾ അരങ്ങേറി. കണ്ണൂർ, കാസർകോട് എന്നിവിടങ്ങളിൽ മന്ത്രി ഒ. ജെ. ജനീഷിന്റെ വാഹനം ഡിവൈഎഫ്ഐ പ്രവർത്തകർ തടഞ്ഞത് സംഘർഷത്തിൽ കലാശിച്ചിരുന്നു. മന്ത്രി ഒ. ജെ. ജനീഷിനെതിരായ പ്രതിഷേധം സിപിഐഎം അറിവോടെയാണെന്നായിരുന്നു പ്രതിപക്ഷ നേതാവ് വി. ഡി. സതീശന്റെ ആരോപണം.
