ബംഗളൂരു: ചിന്നസ്വാമി സ്റ്റേഡിയത്തിലെ ആള്ക്കൂട്ട ദുരന്തത്തില് മൂന്നു മാസത്തിനുശേഷം ആദ്യമായി പ്രതികരിച്ച് സൂപ്പര് താരം വിരാട് കോലി. ആരാധകരുടെ നഷ്ടം തങ്ങളുടേത് കൂടിയെന്ന് പറഞ്ഞ കോലി ടീമിന്റെ ചരിത്രത്തില് എന്നെന്നും ഓര്ക്കപ്പെടേണ്ട ദിവസം ഇങ്ങനെയായി മാറിയതില് ദുഃഖമുണ്ടെന്നും ഇനിയങ്ങോട്ട് ആരാധകരുടെ സുരക്ഷിതത്വം എല്ലാ അര്ത്ഥത്തിലും ഉത്തരവാദിത്വത്തോടെ ഉറപ്പാക്കുമെന്നും ആര്സിബിയുടെ സോഷ്യല് മീഡിയ പേജില് കുറിച്ചു. മരിച്ചവരുടെ കുടംബാംഗങ്ങളുടെ ദു:ഖത്തില് പങ്കചേരുന്നുവെന്നും അവര്ക്കുവേണ്ടി പ്രാര്ത്ഥിക്കുന്നുവെന്നും കോലി പറഞ്ഞു.
ജൂണ് നാലിന് ചിന്നസ്വാമി സ്റ്റേഡിയത്തിലെ ആള്ക്കൂട്ട ദുരന്തത്തില് മരിച്ചവരുടെ കുടുംബത്തിന് റോയല് ചലഞ്ചേഴ്സ് ബംഗളൂരു കഴിഞ്ഞ ആഴ്ച സഹായധനം പ്രഖ്യാപിച്ചിരുന്നു. മരിച്ച 11 പേരുടെ കുടുംബത്തിന് 25 ലക്ഷം രൂപ വീതമാണ് ആര്സിബി സഹായധനം പ്രഖ്യാപിച്ചത്. ജൂണ് 3ന് നടന്ന ഐപിഎല് ഫൈനലിന് തൊട്ടടുത്ത ദിവസം ജൂണ് നാലിന് ആര്സിബിയുടെ വിജയാഘോഷത്തില് പങ്കെടുക്കാനെത്തിയവരാണ് ചിന്നസ്വാമി സ്റ്റേഡിയത്തിന് പുറത്തെ തിക്കിലും തിരിക്കിലും പെട്ട് മരിച്ചത്. 55 പേര്ക്ക് പരിക്കേല്ക്കുകയും ചെയ്തിരുന്നു. ദുരന്തത്തില് പരിക്കേറ്റ ആരാധകരെ സഹായിക്കുന്നതിനായി ആര്സിബി ‘ആര്സിബി കെയേഴ്സ്’ എന്ന പേരില് ഒരു ഫണ്ട് രൂപീകരിച്ചുവെന്നും ആര്സിബി വ്യക്തമാക്കിയിരുന്നു.നീണ്ട 18 വര്ഷത്തെ കാത്തിരിരിപ്പിനൊടുവിലാണ് ആര്സിബി ഐപിഎല്ലില് ആദ്യ കിരീടം നേടിയത്.
