ജക്കാർത്ത: ഇൻഡൊനീഷ്യയിൽ ശക്തമായ അഗ്നിപർവത സ്ഫോടനം; ഏഴ് വിമാനത്താവളങ്ങളുടെ പ്രവർത്തനം താത്കാലികമായി നിർത്തിവെച്ചു. ജാവ, സുമാത്ര ദ്വീപുകൾക്കിടയിൽ സ്ഥിതിചെയ്യുന്ന അനക് ക്രാക്കത്തോവ അഗ്നിപർവതത്തിലാണ് വെള്ളിയാഴ്ച രാത്രി ശക്തമായ സ്ഫോടനമുണ്ടായത്. വൻതോതിൽ പുകപടലങ്ങൾ വ്യാപിച്ചതിനെ തുടർന്ന് സുരക്ഷാ മുൻകരുതലിന്റെ ഭാഗമായി വിമാനത്താവളങ്ങൾ അടച്ചിടാൻ ഗതാഗത മന്ത്രാലയം നിർദേശം നൽകി. വിമാന സർവീസുകൾ റദ്ദാക്കിയതോടെ ഏകദേശം 1.70 ലക്ഷം യാത്രക്കാരെ ബാധിച്ചതായി മന്ത്രാലയം അറിയിച്ചു.
ജക്കാർത്തയിലെ രണ്ട് വിമാനത്താവളങ്ങൾക്കു പുറമെ ലാംപങ്, വെസ്റ്റ് ജാവ തുടങ്ങിയ പ്രവിശ്യകളിലെ വിമാനത്താവളങ്ങളുടെയും പ്രവർത്തനമാണ് നിർത്തിവെച്ചത്. സർവീസുകൾ എപ്പോൾ പുനരാരംഭിക്കാനാകുമെന്ന് ഇപ്പോൾ പറയാനാകില്ലെന്ന് ഗതാഗതമന്ത്രി ദുഡി പൂർവഗന്ധി അറിയിച്ചു. ആകെ എട്ട് വിമാനത്താവളങ്ങളിലായി 1,558 വിമാന സർവീസുകൾ വൈകിയതായും മന്ത്രാലയം വ്യക്തമാക്കി.
അഗ്നിപർവത സ്ഫോടനത്തിന്റെ പശ്ചാത്തലത്തിൽ ജക്കാർത്തയിലെ സ്കൂളുകളിൽ തിങ്കളാഴ്ച ഓൺലൈൻ ക്ലാസുകളിലേക്ക് മാറി. കപ്പൽ ഗതാഗതത്തെയും സ്ഫോടനം ബാധിച്ചിട്ടുണ്ട്. പ്രകൃതിദുരന്തത്തെ തുടർന്നുള്ള നിയന്ത്രണമായതിനാൽ യാത്രക്കാരുടെ ഭാഗത്തുനിന്ന് വലിയ പ്രതിഷേധമുണ്ടായില്ല.
ശനിയാഴ്ചയുണ്ടായ സ്ഫോടനത്തിൽ അഗ്നിപർവതത്തിൽനിന്ന് ലാവ പുറത്തേക്ക് ഒഴുകിയിരുന്നു. കിലോമീറ്ററുകൾ അകലെവരെ വലിയ ശബ്ദവും കേട്ടു. ഞായറാഴ്ച രാത്രിയും സ്ഫോടനങ്ങൾ തുടർന്നു. വരും ദിവസങ്ങളിലും കൂടുതൽ സ്ഫോടനങ്ങൾക്ക് സാധ്യതയുണ്ടെന്നാണ് അഗ്നിപർവത നിരീക്ഷണ ഏജൻസിയുടെ മുന്നറിയിപ്പ്.
ജാവയെയും സുമാത്രയെയും വേർതിരിക്കുന്ന കടലിടുക്കിലൂടെ സഞ്ചരിക്കുന്ന കപ്പലുകൾ അതീവ ജാഗ്രത പാലിക്കണമെന്ന് അധികൃതർ നിർദേശം നൽകി. അഗ്നിപർവതത്തിന് ചുറ്റുമുള്ള മൂന്ന് കിലോമീറ്റർ നിരോധിത മേഖലയിൽ യാതൊരു തരത്തിലുള്ള യാനങ്ങളും പ്രവേശിക്കരുതെന്നും പ്രാദേശിക തുറമുഖ അതോറിറ്റി അറിയിച്ചു.
