കല്പ്പറ്റ: വയനാട് കാരാപ്പുഴ ഡാമിന്റെ സ്പില്വേ ഷട്ടറുകള് നാളെ തുറക്കുമെന്ന് ജില്ലാ ഭരണകൂടം. ഡാമിലെ ജലനിരപ്പ് 757.10 എംഎസ് എല്ലില് എത്തിയ സാഹചര്യത്തിലാണ് നടപടി. ശനിയാഴ്ച രാവിലെ 11 മണി മുതല് ഡാമിന്റെ മൂന്ന് ഷട്ടറുകള് തുറക്കുമെന്നാണ് അറിയിപ്പ്.
ഡാമിന്റെ മൂന്ന് ഷട്ടറുകള് 5 സെന്റീമീറ്റര് വീതം ഉയര്ത്തി സെക്കന്ഡില് 1.557 ക്യുബിക് മീറ്റര് വെള്ളമാണ് പുറത്തേക്ക് ഒഴുക്കുക. വരും ദിവസങ്ങളില് രാവിലെ 6 മണി മുതല് വൈകുന്നേരം 6 മണി വരെയായിരിക്കും വെള്ളം ഒഴുക്കിക്കളയുക. കാലവര്ഷത്തിന് മുന്നോടിയായുള്ള മുന്കരുതലിന്റെ ഭാഗമായിട്ടാണ് നടപടി. കാലവര്ഷം ജൂണ് ആദ്യമേ തന്നെ ആരംഭിക്കുമെന്ന സൂചനയും മുന്വര്ഷങ്ങളിലെ കനത്ത മഴയും കണക്കിലെടുത്താണ്, ഡാമിലെ ജലനിരപ്പ് നിയന്ത്രിക്കുന്നത്.
ഡാമിന്റെ പരിസരപ്രദേശങ്ങളില് താമസിക്കുന്നവരും പുഴയുടെ ഇരുഭാഗങ്ങളിലുള്ളവരും അതീവ ജാഗ്രത പാലിക്കണമെന്ന് അധികൃതര് നിര്ദേശിച്ചു. പുഴകളില് ഇറങ്ങാനോ, മുറിച്ചുകടക്കാനോ പാടില്ല.
