കോഴിക്കോട്: വീട്ടിലെ വരാന്തയിൽ ഇരിക്കുകയായിരുന്ന ഗൃഹനാഥന് കാട്ടുപന്നിയുടെ ആക്രമണത്തിൽ പരിക്ക്. കോഴിക്കോട് മലയോര മേഖലയായ കട്ടിപ്പാറയിലാണ് സംഭവം. വെട്ടിഒഴിഞ്ഞ തോട്ടത്തിൽ താമസിക്കുന്ന കെ.കെ. അബ്ദുൽ ഖാദർ (59) ആണ് ആക്രമണത്തിൽ പരിക്കേറ്റത്.

രാവിലെ ഏഴ് മണിയോടെയാണ് സംഭവം. വീടിന്റെ വരാന്തയിൽ ഇരുന്ന് പത്രം വായിക്കുകയായിരുന്ന അബ്ദുൽ ഖാദറിന് നേരെ പെട്ടെന്ന് കാട്ടുപന്നി പാഞ്ഞടുക്കുകയായിരുന്നു. വീടിന്റെ ഗേറ്റ് കടന്നെത്തിയ കാട്ടുപന്നി ഖാദറിനെ ആക്രമിക്കുകയായിരുന്നു.

ആക്രമണത്തിൽ പരിക്കേറ്റ അബ്ദുൽ ഖാദറിനെ ഉടൻ താമരശ്ശേരി താലൂക്ക് ആശുപത്രിയിൽ പ്രവേശിപ്പിച്ചു. പിന്നീട് വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.

സംഭവത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. ജനവാസ മേഖലയിൽ പകൽസമയത്ത് കാട്ടുപന്നിയുടെ ആക്രമണമുണ്ടായതിൽ പ്രദേശവാസികൾ കടുത്ത ആശങ്കയിലാണ്. ജനങ്ങളുടെ സുരക്ഷ ഉറപ്പാക്കാൻ അടിയന്തര നടപടി വേണമെന്ന ആവശ്യവും ഉയർന്നിട്ടുണ്ട്.