മലപ്പുറം: നിയമസഭാ തെരഞ്ഞെടുപ്പ് വിജയത്തിന് പിന്നാലെ നടന്ന മുസ്ലീം ലീഗിന്റെ ആഹ്ലാദപ്രകടനത്തിനിടെ ആടിന്റെ തലയറുത്ത് പ്രദര്ശിപ്പിച്ച് പ്രവര്ത്തകരുടെ ക്രൂരത. തവനൂര് മണ്ഡലത്തിലെ തൃപ്രങ്ങോട് പഞ്ചായത്തിലെ യുഡിഎഫ് വിജയാഹ്ലാദത്തിനിടെ ഇന്നലെയാണ് സംഭവം. ഇതിന്റെ ദൃശ്യങ്ങള് സാമൂഹിക മാധ്യമങ്ങളില് വൈറലായി. വലിയ വിമര്ശനമാണ് ഉയരുന്നത്.
തൃപ്രങ്ങോട് പെരുന്തല്ലൂര് അങ്ങാടിയിലാണ് ആടിന്റെ തല വടിയില് കെട്ടി പ്രദര്ശിപ്പിച്ചത്. യൂത്ത് ലീഗ് പെരുന്നല്ലൂര് വാര്ഡ് സെക്രട്ടറിയും തൃപ്രങ്ങോട് പഞ്ചായത്ത് ഭാരവാഹിയുമായ കുരിക്കള്പടി മച്ചിങ്ങല് റാഫി, വാല്പറമ്പില് ഷുഹൈബ് എന്നിവരുടെ നേതൃത്വത്തിലായിരുന്നു സംഭവം. ഇവര് തന്നെ പങ്കുവെച്ച ദൃശ്യങ്ങള് വൈറലായതോടെ വ്യാപക വിമര്ശനം ഉയരുന്നുണ്ട്.
