തിരുവനന്തപുരം: പീച്ചി ഡാമിലെ ജലനിരപ്പ് നിയന്ത്രിക്കുന്നതിനായി ഇന്ന് ഉച്ചക്ക് 12 മണിക്ക് നാല് സ്പിൽവേ ഷട്ടറുകൾ ഓരോന്നും രണ്ട് ഇഞ്ച് ഉയർത്തുമെന്ന് പീച്ചി അസിസ്റ്റന്റ് എക്സിക്യൂട്ടീവ് എഞ്ചിനീയർ അറിയിച്ചു.

കെ.എസ്.ഇ.ബി ചെറുകിട വൈദ്യുതി നിലയത്തിൽ സാങ്കേതിക പ്രശ്നങ്ങൾ നേരിട്ടതിനെത്തുടർന്നാണ് ഷട്ടറുകൾ ഉയർത്താനുള്ള തീരുമാനം. ഇന്നലെ രാവിലെ മുതൽ നിലയത്തിലൂടെ വെള്ളം പുറത്തേക്കൊഴുകിക്കൊണ്ടിരുന്നെങ്കിലും അറ്റകുറ്റപ്പണികൾ പൂർത്തിയാകുന്നതുവരെ ഡാമിലെ ഒഴുക്ക് തടസപ്പെടുമെന്ന സാഹചര്യത്തിലാണ് നടപടി.

ഷട്ടറുകൾ ഉയർത്തുന്നതിലൂടെ മണലി, കരുവന്നൂർ പുഴകളിലെ ജലനിരപ്പ് നിലവിലെ നിലയേക്കാൾ ഏകദേശം 20 സെന്റിമീറ്റർ ഉയരാൻ സാധ്യതയുണ്ട്. അതിനാൽ പുഴയോരത്ത് താമസിക്കുന്നവരും പുഴക്കരയിൽ ജോലിയെടുക്കുന്നവരും കർശനമായ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.