ത്യശ്ശൂര്: ശക്തമായ മഴയില് തൃശൂര് കൊടകരയില് കെട്ടിടം തകര്ന്നു വീണു. അതിഥി തൊഴിലാളികള് താമസിച്ചിരുന്ന ഇരുനില കെട്ടിടമാണ് ഇടിഞ്ഞുവീണത്. മൂന്ന് പേര് മരിച്ചു. രാഹുല്, അലീം, റൂബല് എന്നിവരാണ് മരിച്ചത്.
പൊലീസും ഫയര്ഫോഴ്സും നാട്ടുകാരുമാണ് രക്ഷാപ്രവര്ത്തനത്തില് ഏര്പ്പെട്ടത്.17 പേരോളം ആണ് കെട്ടിടത്തില് ഉണ്ടായിരുന്നത്. രാവിലെ ഏകദേശം ആറുമണിയോടെയാണ് കെട്ടിടം ഇടിഞ്ഞു വീണത്. വീട് തകര്ന്നുവീഴത്തോടെ മറ്റുള്ളവര് 14 പേരും ഓടി രക്ഷപ്പെടുകയായിരുന്നു.രാവിലെ എഴുന്നേറ്റ് ജോലിക്ക് പോകുന്നതിനുള്ള തയ്യാറെടുപ്പിനിടയിലാണ് അപകടമുണ്ടായത്.
കൊടകര ടൗണില് തന്നെയുള്ള കെട്ടിടമാണ് തകര്ന്നത്. കെട്ടിടത്തിന്റെ അവശിഷ്ടങ്ങള്ക്കിടയിലാണ് തൊഴിലാളികള് കുടുങ്ങിയതെന്ന് കരുതുന്നു. ചെങ്കല്ലുകൊണ്ട് നിര്മിച്ച കെട്ടിടം കനത്ത മഴയെ തുടര്ന്ന് തകര്ന്നു വീഴുകയായിരുന്നു. കെട്ടിടം പൂര്ണമായി പൊളിക്കാന് നിര്ദേശം നല്കിയതായാണ് വിവരം. രക്ഷാപ്രവര്ത്തനം പുരോഗമിക്കുന്നു.
