തിരുവനന്തപുരം: ലോകമെമ്പാടും ദശലക്ഷക്കണക്കിന് ആളുകൾ ദിവസേന ഉപയോഗിക്കുന്ന ഗൂഗിൾ ക്രോം ബ്രൗസർ ഇനി കൂടുതൽ സ്മാർട്ടാകുന്നു. ഗൂഗിൾ, തന്റെ ഏറ്റവും പുതിയ അപ്ഡേറ്റിലൂടെ ക്രോമിൽ ജെമിനി എഐ സംയോജിപ്പിച്ചിരിക്കുകയാണ്. ക്രോമിന്റെ ചരിത്രത്തിലെ ഏറ്റവും പ്രധാനപ്പെട്ട നവീകരണങ്ങളിൽ ഒന്നായി കമ്പനി ഇതിനെ വിലയിരുത്തുന്നു.
ഓപ്പൺഎഐ, ആന്ത്രോപിക്, പെർപ്ലെക്സിറ്റി തുടങ്ങിയ എതിരാളികൾ എഐ അധിഷ്ഠിത ബ്രൗസിംഗ് ടൂളുകൾ അവതരിപ്പിക്കുന്ന സാഹചര്യത്തിലാണ് ഗൂഗിളിന്റെ നീക്കം. തുടക്കത്തിൽ അമേരിക്കയിലെ മാക്, വിൻഡോസ് ഉപകരണങ്ങളിലെയും മൊബൈൽ പ്ലാറ്റ്ഫോമുകളിലെയും ഉപയോക്താക്കൾക്ക് ജെമിനി എഐ ലഭ്യമാകും. പിന്നീട് ഐ ഓ എസ് , ആൻഡ്രോയിഡ് പതിപ്പുകളിലും ഇത് എത്തും.
ക്രോമിൽ ഉൾപ്പെടുത്തിയിരിക്കുന്ന പുതിയ ‘ജെമിനി ബട്ടൺ’ ഉപയോക്താക്കൾക്ക് വെബ്പേജുകളുടെ ഉള്ളടക്കത്തെക്കുറിച്ച് ചോദ്യങ്ങൾ ചോദിക്കാനും, വിവരങ്ങൾ സംഗ്രഹിക്കാനും, ഒരേസമയം പല ടാബുകളുമായി സംവദിക്കാനും സഹായിക്കും. കൂടാതെ, ജെമിനി ക്രോം ബ്രൗസറിനെയും ഗൂഗിളിന്റെ മറ്റ് സേവനങ്ങളായ യൂട്യൂബ്, മാപ്സ്, കലണ്ടർ എന്നിവയുമായും നേരിട്ട് ബന്ധിപ്പിക്കുന്ന ഒരു പാലമായും പ്രവർത്തിക്കും.
ഉപയോക്താക്കൾക്ക് ടാബുകൾ മാറാതെ തന്നെ വിവിധ ആപ്പുകളുമായി ഇടപെടാനും, ബ്രൗസിംഗ് ഹിസ്റ്ററിയും സെർച്ച് ലിങ്കുകളും എഐ ഭാഗികമായി ഓർത്തുവച്ച് വീണ്ടും ഉപയോഗിക്കാനും കഴിയുന്നതായിരിക്കും. അതേസമയം, ഓമ്നിബാർ അപ്ഡേറ്റ് ചെയ്തുകൊണ്ട് പേജ്-സ്പെസിഫിക് ചോദ്യങ്ങൾക്കും എഐ സഹായത്തോടെ സെർച്ച് സംവിധാനത്തിനും പിന്തുണ നൽകും.
