ന്യൂയോർക്ക്: ന്യൂയോർക്കിൽ നടന്ന ഐക്യരാഷ്ട്രസഭ സമ്മേളനത്തിൽ പലസ്തീനിനെ സ്വതന്ത്ര രാഷ്ട്രമായി അംഗീകരിക്കുന്നതിന് ഫ്രാൻസും പിന്തുണ പ്രഖ്യാപിച്ചു. ഫ്രാൻസ് പ്രസിഡന്റ് ഇമ്മാനുവൽ മാക്രോൺ, ഇസ്രയേലും പലസ്തീനും സമാധാനവും സുരക്ഷയും കൈകോർത്തുനിൽക്കുന്ന രണ്ട് രാഷ്ട്രങ്ങളാകണമെന്ന് ആവശ്യപ്പെട്ടു. 150-ലധികം രാജ്യങ്ങളാണ് പലസ്തീനിന് പിന്തുണയുമായി രംഗത്തെത്തിയത്.
ഫ്രാൻസിന്റെയും സൗദി അറേബ്യയുടെയും അധ്യക്ഷതയിൽ ചേർന്ന സമ്മേളനത്തിൽ ജർമ്മനി, ഇറ്റലി, അമേരിക്ക എന്നിവർ പങ്കെടുത്തില്ല. ഇതിനിടെ, ബ്രിട്ടൻ പലസ്തീനിനെ സ്വതന്ത്ര രാഷ്ട്രമായി അംഗീകരിക്കുന്നതായി പ്രധാനമന്ത്രി കെയ്ർ സ്റ്റാർമർ സമൂഹമാധ്യമങ്ങളിലൂടെ പ്രസ്താവിച്ചു. ഇസ്രയേൽ തടവിലിട്ടിരിക്കുന്ന ബന്ദികളെ ഹമാസ് വിട്ടയയ്ക്കണമെന്നും സമാധാനത്തിനുള്ള സാധ്യതകൾ അവസാനിച്ചിട്ടില്ലെന്നും സ്റ്റാർമർ വ്യക്തമാക്കി.
അൻഡോറ, ബെൽജിയം, ലക്സംബർഗ്, മാൾട്ട, മൊണാകോ അടക്കമുള്ള രാജ്യങ്ങളും സമ്മേളനത്തിൽ പലസ്തീനിനെ അംഗീകരിച്ചു. ഓസ്ട്രേലിയ, കാനഡ, പോർച്ചുഗൽ എന്നിവിടങ്ങളിൽ നിന്ന് ഉടൻ ഔദ്യോഗിക പ്രഖ്യാപനം പ്രതീക്ഷിക്കപ്പെടുന്നു. ലോക രാഷ്ട്രങ്ങളിൽ 80 ശതമാനത്തിലധികം പലസ്തീനിനെ അംഗീകരിച്ചതോടെ ഇസ്രയേലിന് മേൽ സമ്മർദ്ദം വർദ്ധിച്ചിരിക്കുകയാണ്.
ഇസ്രയേലിന്റെ ആക്രമണങ്ങളിൽ ഇതുവരെ ഗാസയിൽ 65,300-ത്തിലധികം പലസ്തീനികൾ കൊല്ലപ്പെട്ടതായി റിപ്പോർട്ടുണ്ട്. സ്പെയിൻ, നോർവെ, അയർലാൻഡ് തുടങ്ങിയ രാജ്യങ്ങൾ കഴിഞ്ഞ വർഷം തന്നെ പലസ്തീനിനെ സ്വതന്ത്ര രാഷ്ട്രമായി അംഗീകരിച്ചിരുന്നു.
അതേസമയം, പലസ്തീൻ പ്രസിഡന്റ് മഹ്മൂദ് അബ്ബാസ്, ഗാസയിൽ ഹമാസിന് യാതൊരു പങ്കുമില്ലെന്നും ഹമാസും അനുയായികളും പലസ്തീൻ അതോറിറ്റിക്ക് മുമ്പിൽ കീഴടങ്ങണമെന്നും വ്യക്തമാക്കി. ഹമാസ് നടത്തുന്ന ആക്രമണങ്ങളെ അദ്ദേഹം അപലപിക്കുകയും ചെയ്തു. വിസാ വിലക്കിനെ തുടർന്ന് അബ്ബാസ് വീഡിയോ കോൺഫറൻസ് വഴിയാണ് സമ്മേളനത്തിൽ സംസാരിച്ചത്.
