തിരുവനന്തപുരം: ട്രാന്സ്ജെന്ഡര് ക്ഷേമമേഖലയിലെ സ്വപ്ന പദ്ധതിയായ ‘സുഭദ്രം’ ഭവനപദ്ധതി ഒക്ടോബര് 22ന് ഉദ്ഘാടനം ചെയ്യുമെന്ന് ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആര് ബിന്ദു. രാവിലെ 11 മണിക്ക് തിരുവനന്തപുരം ജില്ലാ പഞ്ചായത്ത് ഇ എം എസ് ഹാളിലാണ് പദ്ധതിയുടെ ഉദ്ഘാടനം.
സുരക്ഷിതമല്ലാത്ത ജീവിതസാഹചര്യങ്ങളില് ജീവിക്കേണ്ടി വരുന്ന ട്രാന്സ്ജെന്ഡര് വ്യക്തികള്ക്ക് ആശ്വാസമേകാനാണ് പദ്ധതി ആരംഭിക്കുന്നത്. സാമൂഹ്യനീതി വകുപ്പ് സുവര്ണ്ണ ജൂബിലി ആഘോഷിക്കുന്ന വേളയിലാണ് ഈ പദ്ധതി പ്രാവര്ത്തികമാക്കുന്നതെന്നതില് അഭിമാനമുണ്ടെന്ന് മന്ത്രി ഡോ. ആര്. ബിന്ദു പറഞ്ഞു.
‘സുഭദ്രം’ ഭവനപദ്ധതിയുടെ ലോഗോ പ്രകാശനവും പദ്ധതി ആനുകൂല്യ വിതരണവും ചടങ്ങില് നിര്വ്വഹിക്കും . അഡ്വ. വി കെ പ്രശാന്ത് എം എല് എ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡണ്ട് അഡ്വ. ഡി സുരേഷ് കുമാര് മുഖ്യാതിഥിയായിരിക്കും. സംസ്ഥാനത്തിന്റെ ട്രാന്സ്ജെന്ഡര് നയം കാലോചിതമായി പരിഷ്കരിക്കുന്നതിന് തയ്യാറാക്കിയ കരടുരേഖയ്ക്ക് അന്തിമരൂപം നല്കാനുള്ള കൂടിയാലോചനാ യോഗവും ഇതേ വേദിയില് നടക്കും.
