ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് പ്രതിപക്ഷ പ്രതിഷേധം ശക്തമാകുന്നു. ഡൽഹി, ജയ്പൂർ, ലഖ്നൗ തുടങ്ങിയ നഗരങ്ങളിൽ യൂത്ത് കോൺഗ്രസ് പ്രവർത്തകർ പ്രതിഷേധ മാർച്ച് സംഘടിപ്പിച്ചു. പലയിടത്തും പ്രതിഷേധക്കാരും പൊലീസും തമ്മിൽ സംഘർഷമുണ്ടായി. പ്രതിഷേധക്കാരെ പൊലീസ് കസ്റ്റഡിയിലെടുത്ത് നീക്കി.
ജയ്പൂരിൽ ബാരിക്കേഡുകൾ മറികടക്കാൻ ശ്രമിച്ച പ്രതിഷേധക്കാർക്ക് നേരെ പൊലീസ് ജലപീരങ്കി പ്രയോഗിച്ചു. ഡൽഹിയിൽ തെരഞ്ഞെടുപ്പ് കമ്മീഷൻ ആസ്ഥാനത്തേക്ക് നടത്തിയ മാർച്ചിൽ നരേന്ദ്ര മോദിയുടെയും ഗ്യാനേഷ് കുമാറിന്റെയും മുഖംമൂടികൾ ധരിച്ചാണ് യൂത്ത് കോൺഗ്രസ് പ്രവർത്തകർ പ്രതിഷേധിച്ചത്. തെരഞ്ഞെടുപ്പ് സംവിധാനത്തിനെതിരായ മുദ്രാവാക്യങ്ങളും പ്രതിഷേധത്തിൽ ഉയർന്നു.
യൂത്ത് കോൺഗ്രസ് ദേശീയ അധ്യക്ഷന്റെ നേതൃത്വത്തിലായിരുന്നു ഡൽഹിയിലെ പ്രതിഷേധം. സാധാരണക്കാരുടെ വോട്ടവകാശം സംരക്ഷിക്കുന്നതുവരെ സമരം തുടരുമെന്നും ഗ്യാനേഷ് കുമാർ അടിയന്തരമായി രാജിവെക്കണമെന്നും പ്രതിഷേധക്കാർ ആവശ്യപ്പെട്ടു. ബാരിക്കേഡുകൾ മറികടന്ന് പ്രതിഷേധിച്ച നേതാക്കളെ പൊലീസ് കസ്റ്റഡിയിലെടുത്ത് നീക്കി.
പ്രതിഷേധത്തിന്റെ പശ്ചാത്തലത്തിൽ തെരഞ്ഞെടുപ്പ് കമ്മീഷൻ ആസ്ഥാനത്തേക്കുള്ള റോഡുകളിൽ നിയന്ത്രണം ഏർപ്പെടുത്തി. യൂത്ത് കോൺഗ്രസ് ആസ്ഥാനത്തിന് മുന്നിലും വൻ പൊലീസ് സന്നാഹത്തെ വിന്യസിച്ചു. ഗ്യാനേഷ് കുമാർ രാജിവെക്കുന്നതുവരെ ശക്തമായ പ്രതിഷേധവുമായി മുന്നോട്ടുപോകുമെന്ന് യൂത്ത് കോൺഗ്രസ് നേതാക്കൾ അറിയിച്ചു.
അതേസമയം, ഡൽഹിയിൽ സി.പി.ഐ.എമ്മും പ്രതിഷേധ മാർച്ച് സംഘടിപ്പിച്ചു. ഭഗത് സിംഗ് ദിനത്തോടനുബന്ധിച്ച് ഭഗത് സിംഗ് പ്രതിമയിലേക്ക് നടത്തിയ മാർച്ചിൽ സി.പി.ഐ.എം ജനറൽ സെക്രട്ടറി എം. എ. ബേബി കേന്ദ്ര സർക്കാരിനും തെരഞ്ഞെടുപ്പ് കമ്മീഷനുമെതിരെ വിമർശനം ഉന്നയിച്ചു.
രാജ്യവ്യാപകമായി കളക്ടറേറ്റ് മാർച്ചും കോൺഗ്രസ് സംഘടിപ്പിച്ചു. തുടർ സമരപരിപാടികൾ തീരുമാനിക്കുന്നതിനായി കോൺഗ്രസ് പ്രവർത്തകസമിതി യോഗം ചേരും. മുംബൈയിലെ പ്രതിഷേധത്തിന് പൊലീസ് അനുമതി നിഷേധിച്ച സാഹചര്യത്തിൽ അനുമതി ലഭിച്ചില്ലെങ്കിലും സമരവുമായി മുന്നോട്ടുപോകുമെന്ന് കോൺഗ്രസ് നേതാക്കൾ അറിയിച്ചു. അനുമതി നിഷേധിച്ചത് ഭയം കൊണ്ടാണെന്ന ആരോപണവും ഉയർന്നു.
ഗാന്ധി ജയന്തി ദിനത്തിൽ വൈകിട്ട് നാലിന് മുംബൈ ശിവജി പാർക്കിൽ പ്രതിഷേധ യോഗം സംഘടിപ്പിക്കുമെന്ന് നേതാക്കൾ അറിയിച്ചു. പ്രതിഷേധ പരിപാടികൾ കൂടുതൽ ശക്തമാക്കാനാണ് പ്രതിപക്ഷ സംഘടനകളുടെ തീരുമാനം.
