പാലക്കാട്: പാലക്കാട് എംഎൽഎ രാഹുൽ മാങ്കൂട്ടത്തിൽ ബലാൽസംഗ കേസിൽ ഒളിവിൽ കഴിയുന്നതിനിടെ, അദ്ദേഹത്തിന്റെ പേഴ്സണൽ സ്റ്റാഫും ഡ്രൈവറും പ്രത്യേക അന്വേഷണ സംഘം കസ്റ്റഡിയിൽ എടുത്തു. ഇവരെ തിരുവനന്തപുരത്തേക്ക് മാറ്റിയെന്നാണ് വിവരം. കോടതി ജാമ്യം നിഷേധിച്ചതിന് ശേഷം രാഹുലിനെക്കുറിച്ച് സ്റ്റാഫിന് അറിയില്ലെന്നും ബന്ധപ്പെട്ടിട്ടില്ലെന്നും അവർ വ്യക്തമാക്കിയിരുന്നു.
ബലാൽസംഗം, ഗർഭധാരണം, നിർബന്ധിത ഗർഭഛിദ്രം എന്നിവ ആരോപണമുള്ള കേസിൽ പ്രോസിക്യൂഷൻ ഡിജിറ്റൽ തെളിവുകളും ചികിത്സാ രേഖകളും കോടതിയിൽ ഹാജരാക്കി. പ്രതിഭാഗം രാഷ്ട്രീയ ഗൂഢാലോചനയാണെന്ന് വാദിച്ചെങ്കിലും, അത് കോടതി സ്വീകരിച്ചില്ല.
രണ്ട് മണിക്കൂർ നീണ്ട വാദങ്ങൾക്കുശേഷം തിരുവനന്തപുരം പ്രിൻസിപ്പൽ സെഷൻസ് കോടതി മുൻകൂർ ജാമ്യ ഹർജി തള്ളി. ഇപ്പോൾ ഹൈക്കോടതിയെ സമീപിക്കാനാണ് രാഹുലിന്റെ നീക്കം.
