ഡല്ഹി: സാഹിത്യലോകത്തിന് നല്കിയ സമഗ്ര സംഭാവനകള് പരിഗണിച്ച് അമര് ഉജാലയുടെ 2025-ലെ ഏറ്റവും ഉയര്ന്ന ‘ശബ്ദ് സമ്മാന്’ ആയ ‘ആകാശ്ദീപ്’ പുരസ്കാരം ഹിന്ദി വിഭാഗത്തില് പ്രമുഖ ഹിന്ദി ചെറുകഥാകൃത്ത് മമ്താ കാലിയയ്ക്കും, ഹിന്ദിയേതര ഇന്ത്യന് ഭാഷകളുടെ വിഭാഗത്തില് പ്രശസ്ത മണിപ്പൂരി എഴുത്തുകാരി അരംബം ഓങ്ബി മെംചൗബിക്കും സമ്മാനിക്കും.
1975നെ അന്താരാഷ്ട്ര വനിതാവര്ഷമായി ഐക്യരാഷ്ട്രസഭ പ്രഖ്യാപിച്ചിരുന്നു. 2025, അതിന്റെ സുവര്ണ ജൂബിലി വര്ഷമാണ് 2026-നെ കാര്ഷിക മേഖലയിലെ സ്ത്രീകളുടെ സംഭാവനകള്ക്കായി സമര്പ്പിക്കാനും ഐക്യരാഷ്ട്രസഭ തീരുമാനിച്ചിട്ടുണ്ട്. ഈ പശ്ചാത്തലത്തില് ഈ രണ്ട് വനിതാ എഴുത്തുകാരെ ആദരിക്കുന്നത് ശ്രദ്ധേയമാണ്.
അഞ്ചു ലക്ഷം രൂപയുടെ ക്യാഷ് അവാര്ഡും പ്രശംസാ ഫലകവും ഗംഗാ പ്രതിമയുമാണ് പുരസ്കാരം. മറ്റ് 5 പേരെ കൂടി ഈ വര്ഷത്തെ മികച്ച സാഹിത്യ പുരസ്കാരങ്ങള്ക്ക് തിരഞ്ഞെടുത്തിട്ടുണ്ട്.
പോസ്റ്റ്കോളോണിയല് ചിന്തയിലേക്കും വനിതാ വ്യക്തിത്വത്തിലേക്കും ശ്രദ്ധേയമായ സംഭാവനകള് നല്കുന്ന തന്റെ രചനകളിലൂടെ മണിപ്പൂരി സാഹിത്യത്തില് അപൂര്വമായ സംഭാവനകള് നല്കിയ വ്യക്തിയാണ് അരംബം ഓങ്ബി മെംചൗബി. ഡോ. തൗനോജം ചാനു ഇബെംഹാല് എന്ന പേരില് 1957 ജനുവരി 1-നാണ് അവര് ജനിച്ചത്. മെയ്തേയ് പുരാണങ്ങളെ ആസ്പദമാക്കിയുള്ള രചനകളിലൂടെ പ്രശസ്തയായ അവര് സമകാലിക മണിപ്പൂരി സാഹിത്യലോകത്തെ കരുത്തുറ്റ ശബ്ദമാണ്.
ഹിന്ദിയിലെ പരമോന്നത ബഹുമതിയായ ‘ആകാശ്ദീപ്’ പുരസ്കാരത്തിന് തിരഞ്ഞെടുക്കപ്പെട്ട മമ്താ കാലിയ 1940 നവംബര് 2ന് ജനിച്ചത്. ഫെമിനിസത്തിന്റെ ആദ്യകാല തരംഗങ്ങള് ഉയര്ന്നുവന്ന കാലഘട്ടത്തില് തന്നെ തന്റെ രചനകളിലൂടെ അവര് ഒരു പുതിയ പാത സൃഷ്ടിച്ചു. പന്ത്രണ്ടിലധികം ശ്രദ്ധേയ കൃതികള് രചിച്ചിട്ടുള്ള അവര്, മധ്യവര്ഗ്ഗത്തിന്റെ സങ്കീര്ണതകള്ക്കും സ്ത്രീ സ്വത്വത്തിനായുള്ള പോരാട്ടത്തിനും കരുത്തുറ്റ ശബ്ദം നല്കിയ എഴുത്തുകാരിയായി അറിയപ്പെടുന്നു.
ആകാശ്ദീപ് പുരസ്കാരത്തിന് കീഴില് ഹിന്ദിക്ക് പുറമെ കന്നഡ, മറാത്തി, ബംഗാളി, ഒഡിയ, മലയാളം, ഗുജറാത്തി ഭാഷകളിലെ സാഹിത്യ സംഭാവനകളും മുമ്പ് ആദരിക്കപ്പെട്ടിട്ടുണ്ട്; ഈ വര്ഷം മണിപ്പൂരി ഭാഷയാണ് തിരഞ്ഞെടുക്കപ്പെട്ടത്. ഹിന്ദിയേതര ഇന്ത്യന് ഭാഷകളില് ഗിരീഷ് കര്ണാട്, ഭാല്ചന്ദ്ര നമദേ, ശംഖ ഘോഷ്, പ്രതിഭാ റായ്, എം. ടി. വാസുദേവന് നായര്, സിതാന്ഷു യശശ്ചന്ദ്ര എന്നിവര് ബഹുമതി നേടിയിട്ടുണ്ട്. ഹിന്ദി വിഭാഗത്തില് നാംവര് സിംഗ്, ഗ്യാന്രഞ്ജന്, വിശ്വനാഥ് ത്രിപാഠി, ശേഖര് ജോഷി, വിനോദ് കുമാര് ശുക്ല, ഗോവിന്ദ് മിശ്ര എന്നിവര്ക്ക് ആകാശ്ദീപ് പുരസ്കാരം ലഭിച്ചിട്ടുണ്ട്.അമര് ഉജാല ശബ്ദ് സമ്മാന് 25ന്റെ ഭാഗമായി 2024ല് പ്രസിദ്ധീകരിച്ച മികച്ച ഹിന്ദി കൃതികള്ക്കുള്ള പുരസ്കാരങ്ങളും പ്രഖ്യാപിച്ചു.
