തൃശ്ശൂർ: ഇമ്മാനുവേൽ മാർത്തോമ പള്ളി, പഴഞ്ഞി ഇടവകയുടെ 130-ാമത് ഇടവകദിനവും ഇടവക കൺവെൻഷനും ആത്മീയതയും ഐക്യവും നിറഞ്ഞ അന്തരീക്ഷത്തിൽ ആഘോഷിച്ചു.
വിശ്വാസ നവീകരണവും സേവനബോധവും മുൻനിർത്തിയുള്ള വിവിധ പരിപാടികളോടെയാണ് ദിനാഘോഷം സംഘടിപ്പിച്ചത്.രാവിലെ 8.00 മണിക്ക് ആരംഭിച്ച വിശുദ്ധ കുർബാനയ്ക്ക് മാർത്തോമ പള്ളി മുൻ കേന്ദ്ര സുവിശേഷ സംഘം സെക്രട്ടറി റവ. ജോർജ് വർഗീസ് അച്ഛൻ മുഖ്യ കാർമ്മികത്വം വഹിച്ചു. ദൈവവചനത്തിന്റെ ആഴവും വിശ്വാസ പുതുക്കലും ആവിഷ്കരിച്ച സന്ദേശം വിശ്വാസികൾക്ക് ആത്മീയ ഉണർവായി.
വിശുദ്ധ കുർബാനയ്ക്ക് ശേഷം അങ്ങാടി ചുറ്റി ഇടവകദിന സുവിശേഷ റാലി നടത്തി. ക്രിസ്തുവിന്റെ സ്നേഹവും സമാധാനവും സമൂഹത്തിലേക്ക് എത്തിക്കുന്ന സന്ദേശമായി റാലി മാറി. തുടർന്ന് ചേർന്ന ഇടവകദിന പൊതുയോഗത്തിൽ ഇടവക വികാരി റവ. അനു ഉമ്മൻ അച്ഛൻ അദ്ധ്യക്ഷത വഹിച്ചു. റവ. ജോർജ് വർഗീസ് അച്ഛൻ മുഖ്യ പ്രഭാഷണം നടത്തി.
ആശംസകൾ അർപ്പിച്ച് സഹ വികാരി റവ. ആന്റണി പൗലോസ് അച്ഛൻ (സെന്റ് മേരീസ് പള്ളി, പഴഞ്ഞി), റവ. കോശി കുരിയൻ അച്ഛൻ (മാർത്തോമ പള്ളി, ആർതാട്ട്) എന്നിവർ പ്രസംഗിച്ചു.ഇടവക ട്രസ്റ്റി ജസ്റ്റിൻ പോൾ ചെറുവത്തൂർ, ഇടവക സെക്രട്ടറി വർഗീസ് തമ്പി, കൈസ്ഥാന സമിതി അംഗങ്ങൾ എന്നിവരുടെ നേതൃത്വത്തിൽ കൺവെൻഷനും അനുബന്ധ പരിപാടികളും ക്രമബദ്ധമായി നടന്നു.
യുവജനങ്ങളും മുതിർന്നവരുമടങ്ങുന്ന വിശ്വാസികൾ വലിയ സംഖ്യയിൽ പങ്കെടുത്ത ഈ ആഘോഷങ്ങൾ ഇടവകയുടെ ചരിത്രഗൗരവത്തിന്റെയും ആത്മീയ ഉണർവിന്റെയും ശക്തമായ സാക്ഷ്യമായി.
