ന്യൂഡൽഹി: കടുത്ത ചൂടിൽ വലയുന്ന രാജ്യത്തിന് ആശ്വാസമായി ഇത്തവണ തെക്കുപടിഞ്ഞാറൻ കാലവർഷം നേരത്തെയെത്താൻ സാധ്യതയുണ്ടെന്ന് പ്രവചനം. യൂറോപ്യൻ സെന്റർ ഫോർ മീഡിയം-റേഞ്ച് വെതർ ഫോർകാസ്റ്റ്സ് (ECMWF) പുറത്തുവിട്ട പുതിയ കണക്കുകൾ പ്രകാരം മേയ് അവസാനത്തോടെ തന്നെ ദക്ഷിണേന്ത്യയിൽ മഴ തുടങ്ങാനിടയുണ്ട്.
ഇപ്പോൾ ഉത്തരേന്ത്യയിലും മധ്യ ഇന്ത്യയിലും താപനില 43–44 ഡിഗ്രി സെൽഷ്യസ് വരെ ഉയർന്നിരിക്കുന്ന സാഹചര്യത്തിലാണ് ഈ പ്രതീക്ഷ നൽകുന്ന വിലയിരുത്തൽ. അൻഡമാൻ നിക്കോബാർ ദ്വീപുകളിൽ മേയ് 18 മുതൽ 25 വരെ കാലവർഷം എത്താൻ സാധ്യതയുണ്ടെന്നും, മേയ് 25 മുതൽ ജൂൺ 1 വരെ കേരളത്തിലും തമിഴ്നാട്ടിന്റെ തെക്കൻ ജില്ലകളിലും സാധാരണയെക്കാൾ കൂടുതൽ മഴ ലഭിക്കാമെന്നും പ്രവചനം പറയുന്നു.
അന്തരീക്ഷ സാഹചര്യങ്ങളിൽ വലിയ മാറ്റങ്ങളില്ലെങ്കിൽ മേയ് 25ഓടെ തന്നെ കേരളത്തിൽ കാലവർഷം പ്രവേശിക്കാമെന്നാണ് കാലാവസ്ഥാ വിദഗ്ധരുടെ നിരീക്ഷണം. നിലവിലുള്ള കടുത്ത ചൂട് സമുദ്രത്തിൽ നിന്നുള്ള കാറ്റുകൾ നേരത്തെ കരയിലേക്ക് നീങ്ങാൻ കാരണമാകുമെന്ന വിലയിരുത്തലും ഉണ്ട്.
ഇത്തവണ കാലവർഷകാലത്ത് എൽ നിനോയുടെ സ്വാധീനം ഉണ്ടാകില്ലെന്നാണ് പ്രതീക്ഷ. ഇന്ത്യൻ മഹാസമുദ്രത്തിലെ താപനില വ്യത്യാസം (Positive IOD) കാലവർഷത്തെ കൂടുതൽ ശക്തമാക്കാൻ സഹായിക്കാനും സാധ്യതയുണ്ട്. മേയ് അവസാനത്തോടെ തെക്കുകിഴക്കൻ അറബിക്കടലിൽ ശക്തമായ പടിഞ്ഞാറൻ കാറ്റുകൾ രൂപപ്പെട്ടു ഈർപ്പമുള്ള മേഘങ്ങളെ ഇന്ത്യൻ തീരത്തേക്ക് എത്തിക്കാനും ഇടയുണ്ട്.
കഴിഞ്ഞ വർഷം (2025) പോലെ തന്നെ ഇത്തവണയും കാലവർഷം നേരത്തെ എത്തുമെന്ന പ്രതീക്ഷയാണ് ഉയരുന്നത്. കൃഷിയെ ആശ്രയിച്ച് ജീവിക്കുന്ന ലക്ഷക്കണക്കിന് ആളുകൾക്കും കടുത്ത ചൂടിൽ നിന്ന് രക്ഷ തേടുന്നവർക്കും ഈ നേരത്തെയുള്ള മഴ വലിയ ആശ്വാസമാകും.
