മലപ്പുറം:സംസ്ഥാനത്ത് പുതിയ മന്ത്രിസഭാ രൂപീകരണ ചർച്ചകൾ അന്തിമഘട്ടത്തിലേക്ക് കടക്കവെ, മുന്നണിയിലെ പ്രമുഖ കക്ഷികളായ മുസ്ലിം ലീഗിലും കോൺഗ്രസിലും മന്ത്രിസ്ഥാനങ്ങളെച്ചൊല്ലിയുള്ള പ്രാദേശിക സമ്മർദ്ദങ്ങളും അണിയറ നീക്കങ്ങളും ശക്തമാകുന്നു. യു.ഡി.എഫ് ക്യാമ്പുകളിൽ ചർച്ചകൾ പുരോഗമിക്കുന്നതിനിടെ, തങ്ങളുടെ പ്രിയ നേതാക്കളെ മന്ത്രിസഭയിൽ ഉൾപ്പെടുത്തണമെന്ന ആവശ്യവുമായി ജനപ്രതിനിധികളും താഴെത്തട്ടിലുള്ള പാർട്ടി പ്രവർത്തകരും പരസ്യമായി രംഗത്തിറങ്ങിയത് നേതൃത്വത്തിന് വലിയ തലവേദനയാകുകയാണ്. മുസ്ലിം ലീഗിൽ ഏറനാട് എം.എ.എൽ പി.കെ. ബഷീറിനായും കാസർകോട് നിന്നുള്ള നേതാവ് എ.കെ.എം. അഷ്റഫിനായും കടുത്ത സമ്മർദ്ദമുയരുമ്പോൾ, കോൺഗ്രസിൽ തൃത്താലയിൽ നിന്നുള്ള വി.ടി. ബൽറാമിനെ മന്ത്രിയാക്കണമെന്ന ആവശ്യമാണ് പ്രവർത്തകർ ശക്തമായി മുന്നോട്ട് വെക്കുന്നത്.
മുസ്ലിം ലീഗ് രാഷ്ട്രീയത്തിൽ മലപ്പുറത്തിന്റെ വികാരമായ ഏറനാട് മണ്ഡലത്തെ പ്രതിനിധീകരിക്കുന്ന പി.കെ. ബഷീറിനെ പുതിയ മന്ത്രിസഭയിൽ ഉൾപ്പെടുത്തണമെന്ന ആവശ്യമാണ് ഇപ്പോൾ മലബാറിൽ നിന്ന് ഏറ്റവും ശക്തമായി ഉയരുന്നത്. ഏറനാട്ടിലെ പ്രാദേശിക പാർട്ടി നേതാക്കളും ത്രിതല പഞ്ചായത്ത് മെമ്പർമാരും ഒന്നിച്ച് ഫേസ്ബുക്ക് ഉൾപ്പെടെയുള്ള സമൂഹമാധ്യമങ്ങളിലൂടെ ഈ ആവശ്യത്തിനായി വിപുലമായ ക്യാമ്പയിൻ ആരംഭിച്ചുകഴിഞ്ഞു. പാർട്ടി ഏൽപ്പിക്കുന്ന ഏത് കഠിനമായ ഉത്തരവാദിത്തവും ജനകീയമായി ഭംഗിയായി നിറവേറ്റുന്ന പി.കെ. ബഷീറിനെ മന്ത്രിസ്ഥാനത്തേക്ക് പരിഗണിച്ചില്ലെങ്കിൽ അത് വലിയ രാഷ്ട്രീയ തിരിച്ചടിയാകുമെന്നാണ് അണികൾ ഒരേസ്വരത്തിൽ വ്യക്തമാക്കുന്നത്. മുസ്ലിം ലീഗ് സംസ്ഥാന വ്യാപകമായി നടപ്പാക്കിയ വയനാട് ഭവന നിർമ്മാണ പദ്ധതി പൂർണ്ണ വിജയത്തിലെത്തിക്കാൻ മുന്നിൽ നിന്ന് നയിച്ച അദ്ദേഹത്തിന്റെ സംഘാടക മികവ് മന്ത്രിസ്ഥാനത്തേക്ക് പരിഗണിക്കപ്പെടാൻ ഏറ്റവും വലിയ യോഗ്യതയാണെന്ന് ഫേസ്ബുക്ക് കുറിപ്പുകളിലൂടെ അണികൾ നേതൃത്വത്തെ ഓർമ്മിപ്പിക്കുന്നുണ്ട്.
ഈ സമ്മർദ്ദങ്ങൾക്ക് പിന്നിൽ വൈകാരികമായ ചില ചരിത്ര പശ്ചാത്തലങ്ങളും പ്രാദേശിക നേതാക്കൾ പരസ്യമായി പങ്കുവെക്കുന്നുണ്ട്. മുസ്ലിം ലീഗിന്റെ ചരിത്രത്തിലെ ജനകീയ അതികായനായിരുന്ന അന്തരിച്ച സീതി ഹാജിയുടെ മകനാണ് പി.കെ. ബഷീർ. മുൻകാലങ്ങളിൽ പാർട്ടിക്ക് വേണ്ടി ജീവിതം സമർപ്പിച്ച സീതി ഹാജിയോട് അന്നത്തെ നേതൃത്വം കാണിച്ച ചില രാഷ്ട്രീയപരമായ ചതികളും അവഗണനകളും മകൻ പി.കെ. ബഷീറിനോട് ഇത്തവണ ആവർത്തിക്കരുത് എന്ന കടുത്ത മുന്നറിയിപ്പാണ് അണികൾ നേതൃത്വത്തിന് നൽകുന്നത്. പഴയകാല അനുഭവങ്ങൾ മുൻനിർത്തി, മലബാറിലെ ലീഗ് രാഷ്ട്രീയത്തിന്റെ ഈ കരുത്തനായ ജനകീയ മുഖത്തിന് ഇത്തവണയെങ്കിലും അർഹമായ പരിഗണന നൽകണമെന്നാണ് അവരുടെ പ്രധാന ആവശ്യം.
നിലവിലെ രാഷ്ട്രീയ സാഹചര്യത്തിൽ മുസ്ലിം ലീഗിന് അഞ്ച് മന്ത്രിസ്ഥാനങ്ങൾ ലഭിക്കുമെന്ന വലിയ പ്രതീക്ഷയിലാണ് പാർട്ടിയും അണികളും ഉള്ളത്. ഇതിൽ മുതിർന്ന നേതാക്കളായ പി.കെ. കുഞ്ഞാലിക്കുട്ടി, കെ.എം. ഷാജി, എൻ. ഷംസുദ്ദീൻ, പാറക്കൽ അബ്ദുള്ള എന്നിവർ മന്ത്രിസ്ഥാനം ഉറപ്പിച്ചു കഴിഞ്ഞതായാണ് പാർട്ടി വൃത്തങ്ങൾ നൽകുന്ന സൂചന. എന്നാൽ അഞ്ചാമത്തെ മന്ത്രിസ്ഥാനത്തിനായി വലിയ രീതിയിലുള്ള മത്സരമാണ് പാർട്ടിയിൽ നടക്കുന്നത്. പി.കെ. ബഷീറിൊപ്പം വി.ഇ. അബ്ദുൽ ഗഫൂർ, എ.കെ.എം. അഷ്റഫ് എന്നിവരുടെ പേരുകളാണ് ഈ സ്ഥാനത്തേക്ക് ലീഗ് നേതൃത്വത്തിന്റെ സജീവ പരിഗണനയിലുള്ളത്.
അതേസമയം, അഞ്ചാമതൊരു മന്ത്രിസ്ഥാനം വേണമെന്ന തരത്തിലുള്ള യാതൊരുവിധ കടുത്ത അവകാശവാദങ്ങളും മുസ്ലിം ലീഗ് ഔദ്യോഗികമായി മുന്നോട്ട് വെച്ചിട്ടില്ലെന്നും യു.ഡി.എഫിന്റെ അന്തിമ തീരുമാനം വരട്ടെ എന്നുമാണ് പാണക്കാട് സയ്യിദ് സാദിഖലി ശിഹാബ് തങ്ങൾ മാധ്യമങ്ങളോട് വ്യക്തമാക്കിയത്. പുതിയ മന്ത്രിസഭാ രൂപീകരണത്തിൽ പ്രാദേശികമായ പ്രാതിനിധ്യവും നേതാക്കളുടെ വ്യക്തിപരമായ മെറിറ്റും എല്ലാം ഒരുപോലെ പരിഗണേണ്ടി വരുമെന്നും, അഞ്ചാം മന്ത്രി ഉണ്ടാകില്ലേ എന്ന മാധ്യമപ്രവർത്തകരുടെ ആവർത്തിച്ചുള്ള ചോദ്യത്തിന് മറുപടിയായി സാദിഖലി തങ്ങൾ കൂട്ടിച്ചേർത്തു. വരുംദിവസങ്ങളിൽ മുന്നണി നേതൃത്വം നടത്തുന്ന ഉഭയകക്ഷി ചർച്ചകൾക്ക് ശേഷമേ ഇതിൽ അന്തിമ തീരുമാനമുണ്ടാകൂ എന്നാണ് പാണക്കാട് നിന്നുള്ള സൂചന.
എന്നാൽ ഇതിനിടയിൽ, അഞ്ചാം മന്ത്രിസ്ഥാനത്തിനായുള്ള പരിഗണനാ പട്ടികയിലുള്ള എ.കെ.എം. അഷ്റഫിനെ മന്ത്രിയാക്കണമെന്ന ആവശ്യവുമായി കുമ്പള മണ്ഡലത്തിലെ കോൺഗ്രസ് കമ്മറ്റി പ്രവർത്തകർ രംഗത്തെത്തിയത് യു.ഡി.എഫിൽ പുതിയ ചർച്ചകൾക്ക് വഴിതുറന്നിരിക്കുകയാണ്. എ.കെ.എം. അഷ്റഫിനെ പുതിയ മന്ത്രിസഭയിൽ ഉൾപ്പെടുത്തണമെന്ന് ആവശ്യപ്പെട്ട് കുമ്പളയിലെ കോൺഗ്രസ് പ്രവർത്തകർ സംസ്ഥാന മുസ്ലിം ലീഗ് നേതൃത്വത്തിന് ഔദ്യോഗികമായി കത്ത് നൽകുകയും ചെയ്തു. സമൂഹ മാധ്യമങ്ങളിലൂടെ അഷ്റഫിനായി വലിയ തോതിലുള്ള പിന്തുണയാണ് കോൺഗ്രസ് പ്രവർത്തകർ പരസ്യമായി പ്രഖ്യാപിക്കുന്നത്. മലബാറിന്റെ അതിർത്തി മേഖലകളിലെ വികസന പിന്നാക്കാവസ്ഥ പരിഹരിക്കാൻ അദ്ദേഹത്തിന്റെ സാന്നിധ്യം അനിവാര്യമാണെന്നാണ് ഇവരുടെ വാദം.
