തിരുവനന്തപുരം: കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര നടപ്പിലാക്കിയാലും ജീവനക്കാരുടെ ശമ്പളവും പെൻഷനും മുടങ്ങില്ലെന്ന് ഗതാഗതമന്ത്രി സി.പി. ജോൺ ഉറപ്പുനൽകി. എല്ലാ മാസവും ഒന്നാം തീയതി തന്നെ ശമ്പളവും പെൻഷനും വിതരണം ചെയ്യാനുള്ള ക്രമീകരണങ്ങൾ സർക്കാരിനുണ്ടെന്നും അദ്ദേഹം വ്യക്തമാക്കി.
കെഎസ്ആർടിസി ജീവനക്കാരുടെ ശമ്പളവും പെൻഷനും സൗജന്യ യാത്രാ പദ്ധതിയുമായി സാമ്പത്തികമായി ബന്ധിപ്പിക്കേണ്ട കാര്യമില്ല. ഇത് സർക്കാരിന്റെ സാമൂഹിക ക്ഷേമ പദ്ധതിയാണ്. ഇതിനായി വ്യക്തമായ സാമ്പത്തിക പദ്ധതിയും തയ്യാറാക്കിയിട്ടുണ്ട്. അതിനാൽ ആശങ്കപ്പെടേണ്ട സാഹചര്യമില്ല, എന്നാണ് മന്ത്രിയുടെ പ്രതികരണം.
അതേസമയം, സ്ത്രീകൾക്ക് സൗജന്യ യാത്ര അനുവദിക്കുന്നതിലൂടെ കെഎസ്ആർടിസിക്ക് വലിയ സാമ്പത്തിക ബാധ്യത ഉണ്ടാകുമെന്ന റിപ്പോർട്ടുകളും പുറത്തുവന്നിട്ടുണ്ട്. മുഴുവൻ ബസുകളിലും പദ്ധതി നടപ്പാക്കിയാൽ വാർഷികമായി ഏകദേശം 112 കോടി രൂപയുടെ നഷ്ടമുണ്ടാകുമെന്നാണ് വിലയിരുത്തൽ. ഓർഡിനറി ബസുകളിൽ മാത്രം പദ്ധതി നടപ്പാക്കിയാൽ 57 കോടി രൂപയും, സിറ്റി ഫാസ്റ്റ് ഉൾപ്പെടെയുള്ള സർവീസുകളിൽ നടപ്പാക്കിയാൽ 65 കോടി രൂപയുടെയും നഷ്ടം സംഭവിക്കാമെന്നാണ് റിപ്പോർട്ടുകൾ സൂചിപ്പിക്കുന്നത്.
യുഡിഎഫ് തെരഞ്ഞെടുപ്പ് വാഗ്ദാനമായ ‘ഇന്ദിരാ ഗ്യാരണ്ടി’ പദ്ധതികളിലൊന്നായിരുന്നു സ്ത്രീകൾക്കുള്ള സൗജന്യ ബസ് യാത്ര. അധികാരത്തിലെത്തിയതിന് പിന്നാലെ ചേർന്ന ആദ്യ മന്ത്രിസഭാ യോഗത്തിലാണ് ജൂൺ 15 മുതൽ സംസ്ഥാനത്തെ കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കാൻ സർക്കാർ തീരുമാനിച്ചത്.
എന്നാൽ, സാമ്പത്തിക പ്രതിസന്ധിയിലൂടെ കടന്നുപോകുന്ന കെഎസ്ആർടിസിക്ക് ഈ പദ്ധതി കൂടുതൽ ബാധ്യതയാകുമെന്ന് പ്രതിപക്ഷം ആരോപിച്ചു. സർക്കാർ ജനക്ഷേമ നടപടികൾ പ്രഖ്യാപിക്കുമ്പോഴും അതിന്റെ സാമ്പത്തിക പ്രതിഫലനം വ്യക്തമായി വിശദീകരിക്കണമെന്നും പ്രതിപക്ഷം ആവശ്യപ്പെടുന്നു.
