കുറച്ചുനാള് മുന്പ് വരെ ഹൃദയാഘാതം പ്രധാനമായും പ്രായമായവരുടെ രോഗമായാണ് കണക്കാക്കിയിരുന്നത്. എന്നാല് ഇന്ന് 30-40 വയസ്സിനിടയിലുള്ളവരിലും അതിനേക്കാള് ചെറുപ്പക്കാരിലും വരെ ഇത് വരുന്നുണ്ട്.
ജീവിതശൈലിയിലെ മാറ്റമാണ് പ്രധാന കാരണം. മണിക്കൂറുകളോളം കമ്പ്യൂട്ടറിന് മുന്നില് ഇരുന്ന് ജോലി ചെയ്യുക, ശാരീരിക അധ്വാനം കുറയുക, വാഹനങ്ങളില് മാത്രം യാത്ര എന്നിവ ഹൃദ്രോഗസാധ്യത വര്ധിപ്പിക്കുന്നു.
യുവാക്കളില് ഹൃദയാഘാതത്തിന് ഏറ്റവും പ്രധാനപ്പെട്ട കാരണങ്ങളില് ഒന്നാണ് പുകവലി. സിഗരറ്റ്, ബീഡി, ഇ-സിഗരറ്റ്, പുകയില ഉല്പ്പന്നങ്ങള് എന്നിവ രക്തക്കുഴലുകള്ക്ക് കേടുവരുത്തുകയും രക്തം കട്ടപിടിക്കാനുള്ള സാധ്യത വര്ധിപ്പിക്കുകയും ചെയ്യുന്നു.
മുമ്പ് മധ്യവയസ്സിലും വാര്ദ്ധക്യത്തിലും കൂടുതലായി കണ്ടിരുന്ന പ്രമേഹവും ഹൈപ്പര്ടെന്ഷനും ഇന്ന് യുവാക്കളിലും സാധാരണമായി കണ്ടുവരുന്നു. ഇവ രണ്ടും ഹൃദ്രോഗത്തിലേക്ക് നയിക്കും.
ഫാസ്റ്റ് ഫുഡ്, അമിത കൊഴുപ്പ് അടങ്ങിയ ഭക്ഷണങ്ങള്, പ്രോസസ്സ് ചെയ്ത ഭക്ഷണങ്ങള് എന്നിവയുടെ ഉപയോഗം വര്ധിച്ചതോടെ മോശം കൊളസ്ട്രോള് (LDL) ഉയരുകയും ധമനികളില് കൊഴുപ്പ് അടിഞ്ഞുകൂടുകയും ചെയ്യുന്നു.
തൊഴില് സമ്മര്ദ്ദം, സാമ്പത്തിക ബാധ്യതകള്, കുടുംബപ്രശ്നങ്ങള്, ഉറക്കക്കുറവ് തുടങ്ങിയവ യുവാക്കളില് വര്ധിച്ചുവരുന്നുണ്ട്. ദീര്ഘകാല മാനസിക സമ്മര്ദ്ദം ഹൃദയാരോഗ്യത്തെ പ്രതികൂലമായി ബാധിക്കുന്നു.
വയറിനു ചുറ്റുമുള്ള കൊഴുപ്പ് ഹൃദ്രോഗ സാധ്യത ഗണ്യമായി വര്ധിപ്പിക്കുന്ന ഘടകമാണ്. അമിതവണ്ണം പ്രമേഹം, ഹൈപ്പര്ടെന്ഷന്, കൊളസ്ട്രോള് വര്ധന എന്നിവയ്ക്കും കാരണമാകുന്നു.
കുടുംബത്തില് ചെറുപ്പത്തില് ഹൃദയാഘാതം ഉണ്ടായവരുണ്ടെങ്കില് അടുത്ത തലമുറയ്ക്കും അപകടസാധ്യത കൂടുതലായിരിക്കും. അത്തരം ആളുകള് കൂടുതല് ജാഗ്രത പാലിക്കേണ്ടതാണ്.
