തിരുവനന്തപുരം: വിലക്കയറ്റത്തലും ഇന്ധന വില കൂടുന്നതിലും പതിനാറാം നിയമസഭയില് പ്രതിപക്ഷത്തിന്റെ ആദ്യ അടിയന്തര പ്രമേയ നോട്ടീസ്. സഭ നിര്ത്തിവെച്ച് ചര്ച്ച ചെയ്യണമെന്ന് ആവശ്യപ്പെട്ട് സിപിഎമ്മിലെ കെഎന് ബാലഗോപാലാണ് അടിയന്തര പ്രമേയം അവതരിപ്പിച്ചത്. പെട്രോള്-ഡീസല് വിലയില് അധിക നികുതി കുറയ്ക്കണമെന്ന് ബാലഗോപാല് ആവശ്യപ്പെട്ടു. ഇപ്പോള് ഇളവ് നല്കാനുള്ള സാമ്പത്തികമുണ്ട്. പാചകവാതക വിലയിലും നികുതി ഇളവ് നല്കണമെന്നും കെ എന് ബാലഗോപാല് ആവശ്യപ്പെട്ടു.
എന്നാല് അടിക്കടി വില വര്ധിക്കുന്ന സാഹചര്യത്തില് നികുതി ഇളവ് ഇപ്പോള് നല്കാനാകില്ല. കുറച്ചു ദിവസം കൂടി കാത്തിരുന്നിട്ട് തീരുമാനമെടുക്കുമെന്ന് മുഖ്യമന്ത്രി വി ഡി സതീശന് പറഞ്ഞു. എന്നെങ്കിലുമൊരു സമയത്ത് വിലക്കയറ്റം നിന്നിട്ട് സഭ ചര്ച്ച ചെയ്യാമെന്ന് പറയുന്നത് നടക്കാത്ത സംഗതിയാണെന്ന് ബാലഗോപാല് മറുപടി നല്കി. ഇതിനു പിന്നില് ഗുരുതരമായ വിഷയമുണ്ടെന്നത് നാട്ടുകാര്ക്കൊക്കെ അറിയാവുന്നതാണ്. പാചകവാതക വില വര്ധന കാരണം ഹോട്ടലുകള് പോലും പ്രവര്ത്തിക്കാനാകാത്ത അവസ്ഥയാണെന്നും ബാലഗോപാല് ചൂണ്ടിക്കാട്ടി.
കഴിഞ്ഞ എല്ഡിഎഫ് സര്ക്കാരിന്റെ കാലത്ത് അന്നത്തെ പ്രതിപക്ഷ നേതാവായിരുന്ന വിഡി സതീശന്, പെട്രോള്- ഡീസല് വിലയില് സംസ്ഥാനത്തിന്റെ നികുതി ഇളവു ചെയ്തു കൊടുക്കണമെന്ന് ആവശ്യപ്പെട്ടിരുന്നു. ഇപ്പോള് മുഖ്യമന്ത്രിയായിരിക്കുമ്പോള് വാക്ക് മാറ്റുകയാണോ എന്നാണ് ബാലഗോപാലിന്റെ ചോദ്യം.
ഇതിനും മുഖ്യമന്ത്രിയുടെ മറുപടി വന്നു. കഴിഞ്ഞ എല്ഡിഎഫ് സര്ക്കാരിന്റെ കാലത്ത് 3100 കോടി രൂപയുടെ അധിക വരുമാനം ഉണ്ടായിട്ട് ഒരു രൂപ പോലും കുറച്ചിട്ടില്ലെന്ന് മുഖ്യമന്ത്രി വിഡി സതീശന് മറുപടി നല്കി. ഒന്നാം പിണറായി സര്ക്കാരില് ധനമന്ത്രിയായിരുന്ന ഡോ. തോമസ് ഐസക്ക് പറഞ്ഞത് അത്തരം മണ്ടത്തരം ഞങ്ങള് ചെയ്യില്ലെന്നാണ്. നികുതി കുറയ്ക്കുന്ന മണ്ടത്തരം ചെയ്യില്ലെന്ന് തോമസ് ഐസക്കാണ് പറഞ്ഞത്. അത്തരം മണ്ടത്തരം ചെയ്യാനാണോ ഇപ്പോള് മുന് ധനകാര്യമന്ത്രി ആവശ്യപ്പെടുന്നതെന്ന് മുഖ്യമന്ത്രി ചോദിച്ചു.
