ഗുവാഹത്തി: അസമിലെ ഗുവാഹട്ടിയിൽ നടന്ന 19-ാമത് ജി.എഫ്.ഐ ദേശീയ ഗ്രാപ്പ്ലിങ് ചാമ്പ്യൻഷിപ്പിൽ കേരള ടീം ശ്രദ്ധേയ പ്രകടനം കാഴ്ചവെച്ച് വൻ നേട്ടം സ്വന്തമാക്കി. രാജ്യത്തെ 18 സംസ്ഥാനങ്ങളിൽ നിന്നായി ഏകദേശം 400 താരങ്ങൾ പങ്കെടുത്ത മത്സരത്തിൽ കേരളം 20 സ്വർണം, 10 വെള്ളി, അഞ്ച് വെങ്കലം ഉൾപ്പെടെ ആകെ 35 മെഡലുകൾ കരസ്ഥമാക്കി.
17 അംഗ സംഘവുമായി മത്സരത്തിനെത്തിയ കേരളം മികച്ച പ്രകടനത്തിന്റെ കരുത്തിൽ ഓവറോൾ ഫസ്റ്റ് റണ്ണർ-അപ്പ് ട്രോഫിയും സ്വന്തമാക്കി. ഗ്രാപ്പ്ലിങ് രംഗത്ത് സംസ്ഥാനത്തിന്റെ വളർച്ചയെ അടിവരയിടുന്ന നേട്ടമായാണ് ഇതിനെ കായികലോകം വിലയിരുത്തുന്നത്.
ദേശീയ ഗ്രാപ്പ്ലിങ് ചാമ്പ്യൻഷിപ്പിന്റെ 19 വർഷത്തെ ചരിത്രത്തിൽ ആദ്യമായാണ് ഉത്തരേന്ത്യയിൽ നടന്ന മത്സരത്തിൽ കേരളം ഇത്രയും സ്വർണമെഡലുകൾ നേടി ഓവറോൾ ഫസ്റ്റ് റണ്ണർ-അപ്പ് സ്ഥാനത്തെത്തുന്നത്. സംസ്ഥാന ഗ്രാപ്പ്ലിങ് ചരിത്രത്തിലെ ഏറ്റവും മികച്ച നേട്ടങ്ങളിലൊന്നായും ഇത് കണക്കാക്കപ്പെടുന്നു.
തൃശൂർ ജില്ലയിലെ കൊനത്തുകുന്ന് ആസ്ഥാനമായുള്ള ജിഎഫ്സി കോമ്പാറ്റ് ജിമ്മിലാണ് ഈ വിജയത്തിന് പിന്നിലെ പ്രധാന പരിശീലന പ്രവർത്തനങ്ങൾ നടന്നത്. കഴിഞ്ഞ 14 വർഷമായി ഗ്രാപ്പ്ലിങ് രംഗത്ത് ദേശീയതല താരങ്ങളെ വളർത്തിയെടുത്തുവരുന്ന ഈ സ്ഥാപനത്തിൽ കോച്ച് അഷ്കർ ബഷീറിന്റെയും കോച്ച് ഷമീലുദ്ദീന്റെയും നേതൃത്വത്തിലുള്ള പരിശീലനമാണ് കേരള ടീമിന്റെ മികവിന് അടിത്തറയായത്.
സംസ്ഥാനത്തിന്റെ കായിക രംഗത്തിന് പുതിയ അഭിമാന നേട്ടം സമ്മാനിച്ച ഈ വിജയം ഗ്രാപ്പ്ലിങ് മേഖലയിലെ കേരളത്തിന്റെ ശക്തമായ മുന്നേറ്റത്തിന്റെ തെളിവായാണ് വിലയിരുത്തപ്പെടുന്നത്.
