ഹൈദരാബാദ്: റോഡ് മുറിച്ചുകടക്കുന്നതിനിടെ കാറിടിച്ച് മൂന്ന് വയസ്സുകാരന് ദാരുണാന്ത്യം. മൻസൂറാബാദ് വെങ്കടേശ്വര കോളനിയിലാണ് അപകടമുണ്ടായത്. ബി. ലക്കി എന്ന മൂന്ന് വയസ്സുകാരനാണ് മരിച്ചത്.
ആരുടെയും ശ്രദ്ധയിൽപ്പെടാതെ ഒറ്റയ്ക്ക് റോഡ് മുറിച്ചുകടക്കാൻ ശ്രമിക്കുന്നതിനിടെയാണ് കുട്ടിയെ കാർ ഇടിച്ചത്. അമിതവേഗത്തിലെത്തിയ കാർ കുട്ടിയെ ഇടിച്ചുതെറിപ്പിക്കുകയായിരുന്നു. അപകടത്തിന്റെ ഞെട്ടിക്കുന്ന ദൃശ്യങ്ങൾ സമീപത്തെ സിസിടിവി ക്യാമറയിൽ പതിഞ്ഞിട്ടുണ്ട്.
കുട്ടി റോഡിലുണ്ടായിരുന്നത് ഡ്രൈവറുടെ ശ്രദ്ധയിൽ പെട്ടെന്ന്പ്പെടാതിരുന്നതാണ് അപകടത്തിന് കാരണമെന്നാണ് പ്രാഥമിക നിഗമനം. ഇടിയുടെ ആഘാതത്തിൽ ഗുരുതരമായി പരിക്കേറ്റ കുട്ടിയെ ഉടൻ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കുട്ടി മരിച്ചതായി ഡോക്ടർമാർ സ്ഥിരീകരിച്ചു.
സംഭവത്തിൽ എൽ.ബി നഗർ പോലീസ് അന്വേഷണം ആരംഭിച്ചു. കാർ ഡ്രൈവർക്കെതിരെ അശ്രദ്ധമായി വാഹനമോടിച്ചതിനും മനപ്പൂർവമല്ലാത്ത നരഹത്യയ്ക്കും കേസെടുത്തതായി പോലീസ് അറിയിച്ചു.
