തിരുവനന്തപുരം: ഗതാഗത മന്ത്രി കെ.ബി. ഗണേഷ് കുമാറുമായുള്ള അഭിപ്രായ വ്യത്യാസങ്ങൾക്കിടെ ഗതാഗത കമ്മീഷണർ സി.എച്ച്. നാഗരാജുവിനെ സ്ഥാനത്ത് നിന്ന് മാറ്റി. മോട്ടോർ വാഹന വകുപ്പിൽ നിന്ന് ഇന്റലിജൻസ് വിഭാഗത്തിലേക്കാണ് മാറ്റിയത്.
സീനിയർ ഐജി സ്പർജൻ കുമാറിനെയാണ് പുതിയ ഗതാഗത കമ്മീഷണറായി നിയമിച്ചത്. എഐ ക്യാമറകൾ സ്ഥാപിച്ച കെൽട്രോണിന് കുടിശിക നൽകുന്നതുമായി ബന്ധപ്പെട്ട വിഷയങ്ങൾ മുതൽ ഉദ്യോഗസ്ഥർക്കെതിരായ അച്ചടക്ക നടപടികൾ വരെ മന്ത്രിയുടെ ഓഫീസും കമ്മീഷണറും തമ്മിൽ അഭിപ്രായ വ്യത്യാസമുണ്ടായിരുന്നുവെന്നാണ് വിവരം.
അതേസമയം, ദക്ഷിണ മേഖല ഐജി ആർ. നിശാന്തിനിയെ ക്രമസമാധാന ചുമതലയിലേക്ക് മാറ്റി നിയമിച്ചു. നേരത്തെ ഇന്റലിജൻസ് വിഭാഗത്തിലായിരുന്നു നിശാന്തിനി. എറണാകുളം മുതൽ തിരുവനന്തപുരം വരെയുള്ള ജില്ലകളുടെ ക്രമസമാധാന ചുമതലയാണ് പുതിയ ഐജിക്ക് ലഭിക്കുക.
