ഇടുക്കി: സംസ്ഥാനത്ത് കാട്ടാന ആക്രമണത്തിൽ ഒരാൾ കൂടി മരിച്ചു. ഇടുക്കി പന്നിയാർ പന്തടികളത്താണ് സംഭവം. പന്തടികളം സ്വദേശി വിജയൻ (47) ആണ് മരിച്ചത്. പണിസ്ഥലത്തെ ഷെഡിൽ നിന്ന് രാവിലെ വീട്ടിലേക്ക് മടങ്ങുന്നതിനിടെയാണ് വിജയൻ കാട്ടാനയുടെ മുന്നിൽപ്പെട്ടത്. തുടർന്ന് ആന ആക്രമിക്കുകയായിരുന്നു. ‘ചക്കക്കൊമ്പൻ’ എന്ന് നാട്ടുകാർ വിളിക്കുന്ന കാട്ടാനയാണ് ആക്രമിച്ചതെന്നാണ് പ്രദേശവാസികൾ പറയുന്നത്.

കഴിഞ്ഞ ഒരാഴ്ചയ്ക്കിടെ സംസ്ഥാനത്ത് കാട്ടാന ആക്രമണത്തിൽ മൂന്ന് പേരാണ് മരിച്ചത്. ഇന്നലെ പാലക്കാട് അട്ടപ്പാടിയിലും കാട്ടാനയുടെ ആക്രമണത്തിൽ സ്ത്രീ മരിച്ചിരുന്നു. മണ്ണാർക്കാട് സ്വദേശിനിയായ ബുഷാര (52) ആണ് മരിച്ചത്. തേക്കുവട്ട ഭാഗത്ത് ഭവാനിപ്പുഴയിൽ ഇറങ്ങിയ വിനോദസഞ്ചാരികളെയാണ് ആന ആക്രമിച്ചത്.

വനപാലകർ അപകട മുന്നറിയിപ്പ് നൽകിയിരുന്നെങ്കിലും ആനയെ കാണാനായി സംഘം പുഴയിൽ നിന്ന് മാറാതെ തുടരുകയായിരുന്നു. ഇതിനിടെയാണ് ആന ആക്രമിച്ചത്. ആക്രമണത്തിൽ ഒരു വിരൽ ഉൾപ്പെടെ നഷ്ടപ്പെട്ട ബുഷാരയെ ഗുരുതര പരിക്കുകളോടെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.