കൊച്ചി: കാക്കനാട്ട് ഹോസ്റ്റലിൽ താമസിച്ചിരുന്ന യുവതിയെ ഭർത്താവ് പുറത്തേക്ക് വിളിച്ചുവരുത്തി പെട്രോൾ ഒഴിച്ച് തീകൊളുത്തിയതായി പരാതി. ഗുരുതരമായി പൊള്ളലേറ്റ ആലപ്പുഴ ചാത്തനാട് സ്വദേശിനി ജയശ്രീയെ (42) സ്വകാര്യ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് പത്തനംതിട്ട സ്വദേശിയായ അനിൽകുമാറിനെ പൊലീസ് കസ്റ്റഡിയിലെടുത്തു. അനിൽകുമാറിന്റെ രണ്ടാം ഭാര്യയാണ് ജയശ്രീയെന്നാണ് വിവരം.
ഇന്നലെ രാത്രി ഒൻപതോടെ എൻജിഒ ക്വാർട്ടേഴ്സിന് സമീപത്തെ അമ്പാടിമൂലയിലുള്ള സ്വകാര്യ ഹോസ്റ്റലിന് മുന്നിലായിരുന്നു സംഭവം. പൊലീസ് പറയുന്നതനുസരിച്ച്, അനിൽകുമാർ ജയശ്രീയെ ഹോസ്റ്റലിൽ നിന്ന് പുറത്തേക്ക് വിളിച്ചുവരുത്തിയ ശേഷം മുഖത്ത് പെപ്പർ സ്പ്രേ പ്രയോഗിച്ചു. തുടർന്ന് കൈയിൽ കരുതിയിരുന്ന കാനിലെ പെട്രോൾ ജയശ്രീയുടെ ശരീരത്തിലും മുഖത്തും ഒഴിച്ച് തീകൊളുത്തിയെന്നാണ് പരാതി.
സംഭവത്തിന് പിന്നാലെ സ്ഥലത്തുനിന്ന് രക്ഷപ്പെടാൻ ശ്രമിച്ച അനിൽകുമാറിനെ നാട്ടുകാർ പിടികൂടി പൊലീസിന് കൈമാറി. സംഭവത്തിനിടെ അനിൽകുമാറിനും കൈയിൽ പൊള്ളലേറ്റിട്ടുണ്ട്. ഒരു സ്വകാര്യ ആശുപത്രിയിലെ പാർക്കിങ് വിഭാഗത്തിൽ താൽക്കാലിക ജീവനക്കാരനാണ് അനിൽകുമാർ. ജയശ്രീയും ഇതേ ആശുപത്രിയിൽ ജോലി ചെയ്തിരുന്നതായി പൊലീസ് അറിയിച്ചു. സംഭവത്തിൽ പൊലീസ് വിശദമായ അന്വേഷണം ആരംഭിച്ചു.
