നഗോയ (ജപ്പാൻ): ഏഷ്യൻ ഗെയിംസിന്റെ പതിനൊന്നാം ദിനത്തിൽ ഇന്ത്യയ്ക്ക് സ്വർണത്തിളക്കം. കോംപൗണ്ട് ആർച്ചറിയിലെ മൂന്ന് സ്വർണ മെഡലുകളും സ്വന്തമാക്കി ഇന്ത്യ ക്ലീൻ സ്വീപ്പ് പൂർത്തിയാക്കി. വനിതാ ടീം, മിക്സഡ് ടീം, പുരുഷ ടീം ഇനങ്ങളിലാണ് ഇന്ത്യ സ്വർണം നേടിയത്.
വനിതകളുടെ കോംപൗണ്ട് ടീം ഫൈനലിൽ ചൈനയെ 238-234 എന്ന സ്കോറിന് പരാജയപ്പെടുത്തിയാണ് ഇന്ത്യൻ സംഘം സ്വർണം സ്വന്തമാക്കിയത്. പിന്നാലെ കോംപൗണ്ട് മിക്സഡ് ടീം ഇനത്തിലും ഇന്ത്യ സ്വർണം നേടി. ഈ നേട്ടത്തോടെ 2028ലെ ലോസ് ഏയ്ഞ്ചൽസ് ഒളിമ്പിക്സിലേക്കുള്ള യോഗ്യതയും ഇന്ത്യ ഉറപ്പാക്കി. പുരുഷ കോംപൗണ്ട് ടീം ഫൈനലിലും ചൈനയെ പരാജയപ്പെടുത്തി സ്വർണം നേടിയതോടെ ആർച്ചറിയിൽ ഇന്ത്യ ഹാട്രിക് തികച്ചു.
ഷൂട്ടിംഗ് ട്രാപ്പ് മിക്സഡ് ടീം ഇനത്തിലും ഇന്ത്യയ്ക്ക് സ്വർണം ലഭിച്ചു. നീരു ദണ്ഡ-കൈനൻ ചെനായി സഖ്യം ഫൈനലിൽ ഖത്തറിനെ ഒരു പോയിന്റിന് മറികടന്നാണ് ഒന്നാമതെത്തിയത്. തുടക്കത്തിൽ പിഴവുകൾ സംഭവിച്ചെങ്കിലും ശക്തമായി തിരിച്ചുവന്നാണ് ഇന്ത്യൻ സഖ്യം സ്വർണം നേടിയത്. രണ്ട് ദിവസത്തിനിടെ നീരു ദണ്ഡ നേടുന്ന രണ്ടാമത്തെ സ്വർണമാണിത്.
ബോക്സിംഗിൽ വനിതകളുടെ 60 കിലോഗ്രാം സെമിഫൈനലിൽ പരാജയപ്പെട്ട പ്രിയ ഘംഗാസ് വെങ്കല മെഡൽ നേടി. 75 കിലോഗ്രാം വിഭാഗത്തിൽ നാറ്റാലിയ ബോഗ്ദാനോവയെ 3-2ന് പരാജയപ്പെടുത്തി ലൗലിന ബോർഗോഹെയ്ൻ ഫൈനലിൽ പ്രവേശിച്ചു.
വനിതാ സ്ക്വാഷ് ടീമും സെമിഫൈനലിൽ കടന്ന് മെഡൽ ഉറപ്പിച്ചു. ജുഡോ 48 കിലോഗ്രാം റിപ്പഷാജിൽ മത്സരിച്ച അസ്മിത ഡേയ്ക്ക് വെങ്കല മെഡൽ പോരാട്ടത്തിൽ പരാജയം നേരിട്ടു.
നാലു സ്വർണം കൂടി നേടിയതോടെ ഏഷ്യൻ ഗെയിംസിൽ ഇന്ത്യയുടെ സ്വർണനേട്ടം ഇരട്ടയക്കം പിന്നിട്ടു. നിലവിൽ 10 സ്വർണവും 21 വെള്ളിയും 28 വെങ്കലവുമടക്കം 59 മെഡലുകളുമായി ഇന്ത്യ ഏഴാം സ്ഥാനത്താണ്.
149 സ്വർണവും 66 വെള്ളിയും 54 വെങ്കലവുമടക്കം 269 മെഡലുകളുമായി ചൈനയാണ് മെഡൽ പട്ടികയിൽ ഒന്നാമത്. 46 സ്വർണമടക്കം 191 മെഡലുകളുമായി ജപ്പാൻ രണ്ടാമതും 24 സ്വർണമടക്കം 99 മെഡലുകളുമായി ദക്ഷിണ കൊറിയ മൂന്നാമതുമാണ്.
