തിരുവനന്തപുരം: എസ്എഫ്ഐ തിരുവനന്തപുരം ജില്ലാ സെക്രട്ടറിയുെട വീട്ടില്‍ കയറി പൊലീസ് അതിക്രമം എന്ന് പരാതി. നന്ദന്റെ അമ്മ മാത്രമുള്ള സമയത്ത് പൊലീസ് മോശമായി പെരുമാറുകയും വീട് വളഞ്ഞ് ഭീകരാന്തരീക്ഷം സൃഷ്ടിക്കുകയും ചെയ്തെന്നാണ് എസ്എഫ്ഐയുടെ ആരോപണം. കന്റോൺമെന്റ് പൊലീസാണ് വീട്ടിലെത്തിയതെന്നും സംഘടന ആരോപിച്ചു.
രാവിലെ 11 മണിയോടെയാണ് പൊലീസ് വീട്ടിലെത്തിയതെന്നാണ് എസ്എഫ്ഐ പറയുന്നത്. പൊലീസ് വീട്ടിലേക്ക് എത്തുന്നതും നാട്ടുകാർ ഇടപെട്ട് തടയുന്നതുമായ ദൃശ്യങ്ങൾ എസ്എഫ്ഐ പുറത്തുവിട്ടിട്ടുണ്ട്. എന്നാൽ വീട് പരിശോധിക്കുന്നതിനായല്ല പൊലീസ് എത്തിയതെന്നാണ് പൊലീസിന്റെ വിശദീകരണം.
എസ്ഐ ഗോകുൽ ഗോപന്റെ ഭീഷണി പരാമർശത്തിന് പിന്നാലെയാണ് സംഭവമെന്നും എസ്എഫ്ഐ ആരോപിച്ചു. നന്ദന്റെ വീട്ടിലേക്ക് മാർച്ച് നടത്തിയാൽ പാർട്ടി ഓഫീസിൽ കയറി നന്ദനെ പിടികൂടുമെന്ന തരത്തിൽ ഗോകുൽ ഗോപൻ ഭീഷണിപ്പെടുത്തിയിരുന്നുവെന്നാണ് ആരോപണം. ഇതിന് പിന്നാലെ ഇന്നലെ എസ്ഐയുടെ വീട്ടിലേക്ക് ഡിവൈഎഫ്ഐ മാർച്ച് നടത്തിയിരുന്നു.
സംഭവത്തിൽ രൂക്ഷ വിമർശനവുമായി എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ് രംഗത്തെത്തി. അടിയന്തരാവസ്ഥക്കാലത്തല്ലാതെ ഇത്തരത്തിലുള്ള പൊലീസ് നടപടികൾ ഉണ്ടായിട്ടില്ലെന്ന് അദ്ദേഹം ആരോപിച്ചു. കന്റോൺമെന്റ് സ്റ്റേഷനിലെ പൊലീസും ഡിസിപിയുടെ പ്രത്യേക സംഘവും നന്ദന്റെ വീട്ടിലെത്തിയെന്നും അമ്മയെ ഉൾപ്പെടെ ഭീഷണിപ്പെടുത്തിയെന്നും സഞ്ജീവ് ആരോപിച്ചു.
യൂണിവേഴ്സിറ്റി ഹോസ്റ്റൽ സംഘർഷവുമായി ബന്ധപ്പെട്ട കേസിലാണ് നന്ദനെ അന്വേഷിച്ചതെങ്കിൽ, സംഭവസമയത്ത് നന്ദൻ സ്ഥലത്തുണ്ടായിരുന്നില്ലെന്നും വിപുലീകൃത ജില്ലാ കമ്മിറ്റി യോഗത്തിന്റെ ഭാഗമായി കോവളത്തായിരുന്നുവെന്നും സഞ്ജീവ് പറഞ്ഞു. പൊലീസ് ഏത് കേസിന്റെ അടിസ്ഥാനത്തിലാണ് വീട്ടിലെത്തിയതെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു.
കന്റോൺമെന്റ് സിഐ വ്യക്തിവൈരാഗ്യം തീർക്കുകയാണെന്ന് നന്ദനും ആരോപിച്ചു. ഔദ്യോഗിക ഫോണിൽ നിന്ന് വിളിച്ച് ഭീഷണിപ്പെടുത്തിയെന്ന ആരോപണത്തിൽ ഇതുവരെ നടപടിയുണ്ടായിട്ടില്ലെന്നും അദ്ദേഹം പറഞ്ഞു. കന്റോൺമെന്റ് സ്റ്റേഷനിലെ പൊലീസ് മറ്റ് സ്റ്റേഷനുകളിൽ നിന്ന് വ്യത്യസ്തമായ സമീപനമാണ് സ്വീകരിക്കുന്നതെന്നും നന്ദൻ ആരോപിച്ചു.
അതേസമയം, സംഭവവുമായി ബന്ധപ്പെട്ട പൊലീസ് നടപടിയെക്കുറിച്ച് കൂടുതൽ വിശദീകരണം ലഭ്യമാകേണ്ടതുണ്ട്. പൊലീസ് വിശദീകരണവും എസ്എഫ്ഐയുടെ ആരോപണങ്ങളും തമ്മിൽ വ്യത്യാസമുണ്ട്.
