തിരുവനന്തപുരം: പിഎസ്‌സി പരീക്ഷാ തട്ടിപ്പ് കേസിൽ ക്രൈംബ്രാഞ്ച് ചോദ്യം ചെയ്യലിനിടെ ചെയർമാൻ ഡോ. എം.ആർ. ബൈജുവും കമ്മിഷൻ അംഗങ്ങളും രേഖപ്പെടുത്തിയത് വ്യത്യസ്ത മൊഴികൾ. എല്ലാ തീരുമാനങ്ങളും കൂട്ടായാണ് എടുത്തതെന്നാണ് ചെയർമാന്റെ മൊഴി. എന്നാൽ, പല തീരുമാനങ്ങളും ചെയർമാൻ ഒറ്റയ്ക്ക് എടുത്തതാണെന്നാണ് ചില അംഗങ്ങൾ മൊഴി നൽകിയതെന്നാണ് വിവരം.
കേസിൽ പ്രതിയായ അഡീഷണൽ ചീഫ് സെക്രട്ടറി ആർ. ഹരിയും എം.ആർ. ബൈജുവും തമ്മിൽ അടുത്ത ബന്ധമുണ്ടെന്ന് ചില പിഎസ്‌സി അംഗങ്ങൾ മൊഴി നൽകിയതായും റിപ്പോർട്ടുകളുണ്ട്. ഹരി ഇപ്പോഴും ഒളിവിലാണെന്നാണ് വിവരം. ഇയാളുടെ വീട് പൂട്ടിയ നിലയിലാണ്. കേസിൽ അറസ്റ്റിലായ മുൻ ഡെപ്യൂട്ടി സെക്രട്ടറി സതീഷിനെ റിമാൻഡ് ചെയ്തു.
ആസൂത്രണ ബോർഡ് പരീക്ഷയിലെ പത്ത് ചോദ്യങ്ങളുടെ മൂല്യനിർണയം നടക്കാതെ പോയത് സാങ്കേതിക പിഴവിനെ തുടർന്നാണെന്നും ബോധപൂർവമായ വീഴ്ചയല്ലെന്നുമാണ് ചെയർമാൻ നൽകിയ മൊഴിയെന്നാണ് റിപ്പോർട്ട്. ഉദ്യോഗസ്ഥരായ ആർ. ഹരിയെയും സതീഷിനെയും സംരക്ഷിക്കുന്ന തരത്തിലുള്ള വിശദീകരണമാണ് ചെയർമാൻ നൽകിയതെന്നാണ് സൂചന.
എന്നാൽ, ചെയർമാന്റെ മൊഴി ക്രൈംബ്രാഞ്ച് പൂർണമായി വിശ്വാസത്തിലെടുത്തിട്ടില്ലെന്നാണ് വിവരം. സംഭവത്തിൽ കൂടുതൽ വ്യക്തത വരുത്തുന്നതിനായി എം.ആർ. ബൈജുവിനെ വീണ്ടും ചോദ്യം ചെയ്തേക്കും. പിഎസ്‌സി അംഗങ്ങളെ മുഴുവൻ ചോദ്യം ചെയ്ത ശേഷമായിരിക്കും ചെയർമാനെ വീണ്ടും വിളിപ്പിക്കുന്നതെന്നാണ് സൂചന.
പരീക്ഷാ മൂല്യനിർണയത്തിലെ വീഴ്ച സാങ്കേതിക പിഴവാണോ അതോ ബോധപൂർവമായ ഇടപെടലാണോ എന്നതടക്കമുള്ള കാര്യങ്ങളിൽ അന്വേഷണത്തിലൂടെ വ്യക്തത വരേണ്ടതുണ്ട്. കേസിൽ ബന്ധപ്പെട്ടവരുടെ മൊഴികളും അന്വേഷണത്തിലെ കണ്ടെത്തലുകളും നിർണായകമാകും.
