കോഴിക്കോട്: കാലാവസ്ഥാ വ്യതിയാനത്തിന്റെ പ്രതിഫലനം ഡെങ്കിപ്പനി വ്യാപനത്തിലും. സാധാരണയായി ഓഗസ്റ്റ് മാസത്തോടെ കുറഞ്ഞുതുടങ്ങുന്ന ഡെങ്കിപ്പനി ഇത്തവണ ഇടവിട്ടുള്ള മഴ തുടരുന്നതിനാൽ വീണ്ടും വർധിക്കുകയാണ്. സംസ്ഥാനത്ത് ഒക്ടോബറിൽ മാത്രം 1,504 പേർക്ക് ഡെങ്കിപ്പനി സ്ഥിരീകരിച്ചു. രോഗം ബാധിച്ച് ഒരാൾ മരിച്ചു. 3,767 പേർക്ക് ഡെങ്കിപ്പനി സംശയിക്കുന്നുണ്ട്. ഇവരിൽ അഞ്ചുപേരും മരിച്ചു.

കഴിഞ്ഞ വർഷം ഒക്ടോബറിലെ കണക്കുകളുമായി താരതമ്യം ചെയ്യുമ്പോൾ ഇത്തവണ ഡെങ്കിപ്പനി സ്ഥിരീകരിച്ചവരുടെ എണ്ണം ഇരട്ടിയിലധികമാണ്. 2025 ഒക്ടോബറിൽ 655 പേർക്കാണ് രോഗം സ്ഥിരീകരിച്ചത്. 1,523 പേർക്ക് രോഗം സംശയിക്കുകയും ചെയ്തിരുന്നു.

തിരുവനന്തപുരം, കൊല്ലം, കോട്ടയം, എറണാകുളം, കോഴിക്കോട്, മലപ്പുറം ജില്ലകളിൽ കഴിഞ്ഞ ദിവസവും ശരാശരി 15 മുതൽ 20 വരെ പേർ ഡെങ്കിപ്പനി സംശയിച്ച് ചികിത്സ തേടിയിട്ടുണ്ട്. ചിലയിടങ്ങളിൽ പ്രതിദിനം 12 മുതൽ 14 പേർക്ക് വരെ രോഗം സ്ഥിരീകരിക്കുന്ന സാഹചര്യവുമുണ്ട്.

സെപ്റ്റംബറിൽ 1,622 പേർക്ക് ഡെങ്കിപ്പനി സ്ഥിരീകരിച്ചപ്പോൾ 4,278 പേർക്ക് രോഗം സംശയിച്ചിരുന്നു. ഈ വർഷം ഇതുവരെ സംസ്ഥാനത്ത് ആകെ 13,108 പേർക്കാണ് രോഗം സ്ഥിരീകരിച്ചത്. 35,192 പേർക്ക് രോഗം സംശയിക്കുന്നുണ്ട്. രോഗം സ്ഥിരീകരിച്ചവരിൽ 44 പേരും രോഗം സംശയിക്കുന്നവരിൽ 35 പേരും മരിച്ചു.

കാലാവസ്ഥാ മാറ്റവും ഡെങ്കി വ്യാപനവും

സാധാരണ കാലവർഷം അവസാനിക്കുന്നതോടെ ഇടവിട്ടുള്ള മഴ കുറയുകയും ഡെങ്കിപ്പനി വ്യാപനം നിയന്ത്രണവിധേയമാകുകയും ചെയ്യാറുണ്ട്. എന്നാൽ ഇത്തവണ കാലവർഷത്തിനു ശേഷവും ഇടയ്ക്കിടെ മഴ തുടരുകയാണ്. ഇത് വീടുകളിലും പരിസരങ്ങളിലും വെള്ളം കെട്ടിനിൽക്കുന്നതിനും കൊതുകുകൾ പെരുകുന്നതിനും കാരണമാകുന്നു. ശക്തമായ മഴയിൽ കൊതുകുകളുടെ ലാർവകൾ നശിക്കുമെങ്കിലും ചെറിയ മഴയിൽ വെള്ളം കെട്ടിനിൽക്കുന്നത് കൊതുകുകളുടെ വളർച്ചയ്ക്ക് അനുകൂല സാഹചര്യമൊരുക്കും. അതിനാൽ വെള്ളം കെട്ടിനിൽക്കുന്ന സാഹചര്യം ഒഴിവാക്കുകയാണ് പ്രധാന പ്രതിരോധമാർഗം.

ഓണക്കാലം കഴിയുന്നതോടെ മഴ കുറയുകയും ഡെങ്കിപ്പനി വ്യാപനം താഴുകയും ചെയ്യുന്നതാണ് പതിവെന്നും ഇത്തവണ അതിനുള്ള സാഹചര്യമല്ല നിലനിൽക്കുന്നതെന്നും കോഴിക്കോട് ഡി.എം.ഒ. ഡോ. എൽ.ടി. സരിതകുമാരി പറഞ്ഞു. ഡെങ്കിപ്പനി പരത്തുന്ന കൊതുകുകൾ രാവിലെയും വൈകുന്നേരവുമാണ് കൂടുതലായി സജീവമാകുന്നത്. കൊതുകുകളുടെ സാന്നിധ്യം ഒഴിവാക്കാനും കടിയേൽക്കാതിരിക്കാനും ജാഗ്രത പാലിക്കണമെന്നും അവർ മുന്നറിയിപ്പ് നൽകി.

ഡെങ്കിപ്പനി കണക്കുകൾ