തൃശ്ശൂർ: മേലെ പട്ടിത്തടം സെന്റ് ഗ്രീഗോറിയോസ് കുരിശുപള്ളി പെരുന്നാളിനോടനുബന്ധിച്ച് ‘ജീവകാരുണ്യ സ്പർശം-2026’ എന്ന പേരിൽ സാമൂഹിക സേവന പ്രവർത്തനങ്ങൾ സംഘടിപ്പിക്കുന്നു.
ജനുവരി 10, 11 തീയതികളിൽ നടക്കുന്ന പെരുന്നാളിൽ, പാവപ്പെട്ട 15 കുടുംബങ്ങൾക്ക് ജീവിതോപാധി കണ്ടെത്തുന്നതിന് സഹായകരമായ സൗജന്യ തയ്യൽ മെഷീനുകളും അരിയും വിതരണം ചെയ്യും.സൗജന്യ തയ്യൽ മെഷീൻ ലഭിക്കുന്നതിനായി അപേക്ഷിക്കേണ്ട അവസാന തീയതി 2026 ജനുവരി 7 ആണെന്ന് സംഘാടകർ അറിയിച്ചു. സാമ്പത്തികമായി പിന്നാക്കം നിൽക്കുന്ന കുടുംബങ്ങളെ സമൂഹത്തിന്റെ മുഖധാരയിലേയ്ക്ക് കൊണ്ടുവരാനുള്ള ശ്രമമാണ് ഈ പദ്ധതിയിലൂടെ ലക്ഷ്യമിടുന്നതെന്നും അവർ കൂട്ടിച്ചേർത്തു.
പെരുന്നാളിന്റെ ആത്മീയോത്സവത്തിനൊപ്പം മനുഷ്യസ്നേഹത്തിന്റെയും സഹകരണത്തിന്റെയും ഉണർവാണ് ‘ജീവകാരുണ്യ സ്പർശം-2026’ എന്ന പരിപാടി മുഖാന്തിരം പ്രതിഫലിക്കുന്നത്.
