പത്തനംതിട്ട: അടൂരിൽ പ്രളയ രക്ഷാപ്രവർത്തനത്തിന് പോയ ഓഫ് റോഡ് വാഹനത്തിന് മോഡിഫിക്കേഷന്റെ പേരിൽ എംവിഡി പിഴയിട്ട സംഭവത്തിൽ നിലപാട് വ്യക്തമാക്കി ആറന്മുള എംഎൽഎ അബിൻ വർക്കി. പ്രളയ സമയത്ത് ജനങ്ങളെ രക്ഷിക്കാൻ എത്തിയവരെ സംരക്ഷിക്കേണ്ടത് ജനപ്രതിനിധിയുടെ ഉത്തരവാദിത്തമാണെന്ന് അദ്ദേഹം പറഞ്ഞു.
നേരത്തെ ജീപ്പിന് പിഴയിട്ടതിനെതിരെ അബിൻ വർക്കി രംഗത്തെത്തിയിരുന്നു. തുടർന്ന് വാഹനത്തിന് പിഴ ചുമത്തിയ എംവിഡി ഉദ്യോഗസ്ഥർക്കെതിരെ നടപടിയും സ്വീകരിച്ചിരുന്നു. എന്നാൽ വാഹനത്തിന് കൂടുതൽ പിഴ ചുമത്താൻ ഹൈക്കോടതി ഉത്തരവിട്ടതോടെ എംഎൽഎക്കെതിരെ വിമർശനം ഉയർന്നിരുന്നു. ഇതിന് പിന്നാലെയാണ് അബിൻ വർക്കി നിലപാട് വ്യക്തമാക്കിയത്.
ആറന്മുളയിൽ വെള്ളം കയറി ജനങ്ങൾ കുടുങ്ങിയപ്പോൾ രക്ഷാപ്രവർത്തനത്തിന് സ്വമേധയാ ഇറങ്ങിയവരാണ് വാഹന ഉടമ അമലും ഭാര്യ ആർദ്രയുമെന്നും എംഎൽഎ പറഞ്ഞു. ഇവരുടെ ജീപ്പിൽ ആറന്മുള ക്ഷേത്ര പരിസരത്ത് നിന്ന് നിരവധി പേരെ രക്ഷപ്പെടുത്തിയതായും അദ്ദേഹം വ്യക്തമാക്കി.
ജില്ലയിൽ വെള്ളം കയറാത്തതും ആളുകൾക്ക് എത്തിച്ചേരാൻ കഴിയുന്നതുമായ പ്രധാന സ്ഥലമായിരുന്നു അടൂർ. സാധനങ്ങൾ വാങ്ങുന്നതിനായി അമലും ആർദ്രയും അടൂരിലെത്തിയപ്പോഴാണ് എംവിഡി വാഹനം പരിശോധിച്ചതെന്നും അബിൻ വർക്കി പറഞ്ഞു.
പ്രളയ രക്ഷാപ്രവർത്തനത്തിന് ഇറങ്ങിയ ആറന്മുള സ്വദേശിക്ക് എന്തെങ്കിലും പ്രശ്നമുണ്ടായാൽ അത് പരിഹരിക്കാൻ ഇടപെടേണ്ടത് ആറന്മുളയുടെ ജനപ്രതിനിധി എന്ന നിലയിൽ തന്റെ കടമയാണെന്നും അബിൻ വർക്കി ഫേസ്ബുക്ക് പോസ്റ്റിലൂടെ വ്യക്തമാക്കി.
