അഫ്ഗാനിസ്ഥാൻ സന്ദർശിക്കാനൊരുങ്ങുന്ന ഇന്ത്യൻ സഞ്ചാരികൾ അറിഞ്ഞിരിക്കേണ്ട പ്രധാനപ്പെട്ട ഒരു വാർത്തയാണ് ഇപ്പോൾ പുറത്തുവരുന്നത്. വിനോദസഞ്ചാര മേഖലയെ ഉത്തേജിപ്പിക്കുന്നതിനും യാത്രാ നടപടികൾ കൂടുതൽ ആധുനികവൽക്കരിക്കുന്നതിനുമായി അഫ്ഗാനിസ്ഥാൻ പുതിയ ഇ-വീസ സംവിധാനം നിലവിൽ കൊണ്ടുവന്നിരിക്കുകയാണ്. വിദേശ പൗരന്മാർക്ക് എംബസികളോ കോൺസുലേറ്റുകളോ നേരിട്ട് സന്ദർശിക്കാതെ തന്നെ ഡിജിറ്റൽ പ്ലാറ്റ്ഫോം വഴി വീസയ്ക്ക് അപേക്ഷിക്കാനുള്ള സൗകര്യമാണ് ഇതിലൂടെ ഒരുങ്ങുന്നത്. അപേക്ഷാ നടപടികൾ കൂടുതൽ സുതാര്യവും വേഗത്തിലുമാക്കാൻ ലക്ഷ്യമിട്ടുള്ള ഈ സംവിധാനത്തിലൂടെ രേഖകൾ സമർപ്പിക്കാനും അപേക്ഷയുടെ പുരോഗതി വിലയിരുത്താനും അപേക്ഷകർക്ക് സാധിക്കും.
എന്നാൽ ഈ പുതിയ ഡിജിറ്റൽ സൗകര്യം ഉപയോഗിക്കുന്ന കാര്യത്തിൽ ഇന്ത്യൻ പാസ്പോർട്ട് ഉടമകൾക്ക് നിലവിൽ ചില നിയന്ത്രണങ്ങളുണ്ട്. തിരഞ്ഞെടുക്കപ്പെട്ട രാജ്യങ്ങളിൽ നിന്നുള്ളവർക്ക് മാത്രമാണ് ഇ-വീസ സൗകര്യം അനുവദിച്ചിട്ടുള്ളത്. നിർഭാഗ്യവശാൽ അഫ്ഗാനിസ്ഥാന്റെ ഇ-വീസയ്ക്ക് അപേക്ഷിക്കാൻ യോഗ്യതയുള്ള രാജ്യങ്ങളുടെ പട്ടികയിൽ നിലവിൽ ഇന്ത്യ ഉൾപ്പെട്ടിട്ടില്ല. അതിനാൽ തന്നെ ടൂറിസം, ബിസിനസ് തുടങ്ങി ഏത് ആവശ്യത്തിനായി അഫ്ഗാനിസ്ഥാനിലേക്ക് പോകാൻ ആഗ്രഹിക്കുന്ന ഇന്ത്യക്കാരാണെങ്കിലും പഴയ രീതിയിലുള്ള വീസ അപേക്ഷാ നടപടികൾ തന്നെ തുടർന്നും പാലിക്കേണ്ടി വരും.
ഇന്ത്യയിൽ നിന്നുള്ള യാത്രക്കാർ ഡിജിറ്റൽ പോർട്ടൽ വഴി ഇ-വീസയ്ക്ക് അപേക്ഷിക്കാൻ ശ്രമിക്കാതെ, നിലവിലുള്ള ഔദ്യോഗിക മാർഗങ്ങളിലൂടെ തന്നെ വീസ നടപടികൾ പൂർത്തിയാക്കാൻ ശ്രദ്ധിക്കേണ്ടതാണ്. അന്താരാഷ്ട്ര യാത്രകൾക്ക് മുൻപായി അതത് രാജ്യങ്ങളിലെ അധികൃതർ നൽകുന്ന ഏറ്റവും പുതിയ നിർദ്ദേശങ്ങൾ പരിശോധിക്കുന്നത് യാത്ര സുഗമമാക്കാൻ സഹായിക്കും. ചുരുക്കത്തിൽ അഫ്ഗാനിസ്ഥാൻ വീസ നടപടികൾ ലളിതമാക്കിയെങ്കിലും ഇന്ത്യൻ പൗരന്മാരെ സംബന്ധിച്ചിടത്തോളം നിലവിലെ അപേക്ഷാ രീതികളിൽ മാറ്റമില്ലെന്ന് സാരം.
