ന്യൂഡെല്ഹി: ബോയിങ് വിമാനങ്ങളിലെ ഫ്യൂവല് കണ്ട്രോള് സ്വിച്ച് പരിശോധനകള് പൂര്ത്തിയായതായി എയര് ഇന്ത്യ അറിയിച്ചു. പരിശോധനയില് ലോക്കിംഗ് സംവിധാനത്തില് പ്രശ്നങ്ങള് ഒന്നും കണ്ടെത്തിയില്ല. ബോയിങ് -787, ബോയിങ്- 737 ശ്രേണിയിലുള്ള വിമാനങ്ങളിലാണ് പരിശോധന നടത്തിയത്. ജൂലൈ 12ന് എയര് ഇന്ത്യ സ്വമേധയാ പരിശോധനകള് ആരംഭിക്കുകയായിരുന്നു. ഈ പരിശോധനയാണിപ്പോള് പൂര്ത്തിയായത്.
അഹമ്മദാബാദില് എയര് ഇന്ത്യ ബോയിങ് 787-8 ഡ്രീംലൈനര് വിമാനം തകര്ന്നുണ്ടായ അപകടത്തിന് പിന്നാലെയാണ് എയര് ഇന്ത്യ പരിശോധന ആരംഭിച്ചത്. അപകടത്തില് 260 പേരാണ് കൊല്ലപ്പെട്ടത്. മുന്കരുതലെന്ന നിലയിലാണ് ബോയിങിന്റെ രണ്ടു ശ്രേണിയിലുള്ള എയര് ഇന്ത്യയുടെ മുഴുവന് വിമാനങ്ങളിലുടെയും ഫ്യുവല് കണ്ട്രോള് സ്വിച്ചുകളുടെ ലോക്കിങ് സംവിധാനത്തില് പ്രശ്നങ്ങളുണ്ടോയെന്ന് പരിശോധിച്ചത്.
ലോക്കിങ് സംവിധാനത്തില് പ്രശ്നങ്ങളൊന്നും കണ്ടെത്താനായിട്ടില്ലെന്നും സുരക്ഷിതമാണെന്നുമാണ് എയര് ഇന്ത്യ അറിയിക്കുന്നത്. യാത്രക്കാരുടെയും ക്യാബിന് ക്രൂ അംഗങ്ങളുടെയും സുരക്ഷ ഉറപ്പാക്കാന് എയര് ഇന്ത്യ പ്രതിജ്ഞാബദ്ധമാണെന്നും ഡിജിസിഎയുടെ നിര്ദേശാനുസരണം സമയപരിധിക്കുള്ളില് തന്നെ പരിശോധന പൂര്ത്തിയാക്കിയെന്നും എയര് ഇന്ത്യ ് അറിയിച്ചു
