വാഷിംഗ്ടണ്: പശ്ചിമേഷ്യയില് സംഘര്ഷം രൂക്ഷമാകുന്നതിനിടെ പുതിയ നീക്കവുമായി അമേരിക്ക. ആണവ ആയുധം വഹിക്കാന് ശേഷിയുള്ള ഭൂഖണ്ഡാന്തര ബാലിസ്റ്റിക് മിസൈലായ മിനട്ട്മാന് -3 പരീക്ഷിച്ച് യുഎസ്. കാലിഫോര്ണിയയിലെ വാന്ഡന്ബര്ഗ് സ്പേസ് ഫോഴ്സ് ബേസില് നിന്നാണ് ചൊവ്വാഴ്ച രാത്രി മിസൈല് വിക്ഷേപിച്ചത്. പരീക്ഷണം വിജയകരമായിരുന്നുവെന്നാണ് റിപ്പോര്ട്ടുകള്.
‘ഡൂംസ്ഡേ’ മിസൈല് എന്നാണ് മിനട്ട്മാന് -3 അറിയപ്പെടുന്നത്. രണ്ടാം ലോകമഹായുദ്ധകാലത്ത് ജപ്പാനിലെ ഹിരോഷിമയില് യുഎസ് പ്രയോഗിച്ച ആറ്റംബോംബിനേക്കാള് 20 മടങ്ങ് പ്രഹരശേഷിയുള്ള ആണവ പോര്മുനകള് വഹിക്കാന് ശേഷിയുള്ളതാണ് ഈ മിസൈല്. ഏകദേശം 10,000 കിലോമീറ്ററോളം ദൂരപരിധിയും മണിക്കൂറില് 24,000 കിലോമീറ്റര് വേഗതയില് സഞ്ചരിക്കാനും ഇവയ്ക്ക് കഴിയും. ഇന്നലത്തെ പരീക്ഷണത്തില് മിസൈല് ആയിരക്കണക്കിന് മൈലുകള് സഞ്ചരിച്ച് പസഫിക് സമുദ്രത്തിലെ മാര്ഷല് ദ്വീപുകള്ക്ക് സമീപം പതിച്ചു.
