വാഷിംഗ്ടൺ: അമേരിക്കയിലെ കാലിഫോർണിയ സംസ്ഥാനത്തെ സാൻ ഡിയേഗോയിലെ മറൈൻ കോർപ്സ് എയർ സ്റ്റേഷൻ മിരാമറിന് സമീപം യു.എസ്. മറൈൻ കോർപ്സിന്റെ എഫ്-35ബി സ്റ്റെൽത്ത് പോർവിമാനം തകർന്നുവീണു. വെള്ളിയാഴ്ച രാവിലെ പ്രാദേശിക സമയം അപകടമുണ്ടായതായാണ് അധികൃതർ അറിയിച്ചത്.
അപകടം സംഭവിക്കുന്നതിന് മുൻപ് പൈലറ്റ് സുരക്ഷിതമായി ഇജക്ട് ചെയ്ത് പുറത്തുകടന്നതിനാൽ ജീവൻ രക്ഷപ്പെട്ടു. പരിക്കേറ്റ പൈലറ്റിനെ ഉടൻ രക്ഷപ്പെടുത്തി വിദഗ്ധ ചികിത്സയ്ക്കായി ആശുപത്രിയിലേക്ക് മാറ്റി. ജീവന് ഭീഷണിയില്ലാത്ത പരിക്കുകളാണുള്ളതെന്ന് സൈനിക വൃത്തങ്ങൾ അറിയിച്ചു.
അപകടത്തിന് പിന്നാലെ വിമാനത്തിൽ നിന്ന് കനത്ത പുകയും തീയും ഉയർന്നതായി ദൃശ്യങ്ങളിൽ കാണാം. അഗ്നിശമന സേന സ്ഥലത്തെത്തി തീ നിയന്ത്രണവിധേയമാക്കി. അപകടത്തിന്റെ കാരണം സംബന്ധിച്ച് അന്വേഷണം ആരംഭിച്ചിട്ടുണ്ട്.
1986-ൽ പുറത്തിറങ്ങിയ ടോം ക്രൂസ് നായകനായ ടോപ്പ് ഗൺ സിനിമയിലൂടെ ലോകശ്രദ്ധ നേടിയ യു.എസ്. നാവികസേനയുടെ ടോപ്പ് ഗൺ പരിശീലന കേന്ദ്രം മുമ്പ് മിരാമറിലായിരുന്നു പ്രവർത്തിച്ചിരുന്നത്.
ലംബമായി ഉയരാനും ഇറങ്ങാനും കഴിവുള്ള അത്യാധുനിക എഫ്-35ബി സ്റ്റെൽത്ത് പോർവിമാനത്തിന്റെ വില ഏകദേശം 109 ദശലക്ഷം ഡോളറാണെന്ന് നിർമാതാക്കളായ ലോക്ക്ഹീഡ് മാർട്ടിൻ വ്യക്തമാക്കുന്നു.
