ന്യൂഡല്ഹി: വ്യവസായി അനില് അംബാനിയുടെ വിവിധ സ്ഥാപനങ്ങളില് ഇ ഡി റെയ്ഡ്. അനില് അംബാനി പ്രൊമോട്ടര് ഡയറക്ടറായിരുന്ന റിലയന്സ് കമ്മ്യൂണിക്കേഷന്സിന്റെ തട്ടിപ്പിന്റെ പേരില് എസ്ബിഐ ‘ഫ്രോഡ്’ ആയി പ്രഖ്യാപിച്ചതിന് പിന്നാലെയാണ് റെയ്ഡ് നടക്കുന്നത്. ഡല്ഹി, മുംബൈ എന്നിവിടങ്ങളിലെ ഇഡി ഉദ്യോഗസ്ഥരാണ് പരിശോധന നടത്തുന്നത്.
സെബി, നാഷണല് ഹൗസിങ് ബാങ്ക്, നാഷണല് ഫിനാന്ഷ്യല് റിപ്പോര്ട്ടിങ് അതോറിറ്റി, ബാങ്ക് ഓഫ് ബറോഡ തുടങ്ങിയവര് കൈമാറിയ വിവരങ്ങള്, സിബിഐ രജിസ്റ്റര് ചെയ്ത രണ്ട് എഫ്ഐആറുകള് എന്നിവയിലാണ് പരിശോധന നടക്കുന്നത്. കമ്പനിയിലെ മുതിര്ന്ന ഉദ്യോഗസ്ഥര്ക്ക് നേരെയും പരിശോധന നീണ്ടേക്കുമെന്നാണ് വിവരം. 2017 മുതല് 2019 വരെയുളള കാലയളവില് യെസ് ബാങ്കില് നിന്ന് ലഭിച്ച 3000 കോടി രൂപ ദുരുപയോഗം ചെയ്തുവെന്നതിലാണ് അന്വേഷണം. ലോണുകള് ലഭിക്കാനായി യെസ് ബാങ്കിന്റെ പ്രൊമോട്ടര്മാര്ക്ക് അനില് അംബാനി കൈക്കൂലി നല്കിയെന്ന ആരോപണത്തിലും അന്വേഷണമുണ്ട്.
അനില് അംബാനിയെയും റിലയന്സ് കമ്മ്യൂണിക്കേഷന്സിനെയും ദിവസങ്ങള്ക്ക് മുന്പ് എസ്ബിഐ ‘ഫ്രോഡ്’ ആയി പ്രഖ്യാപിച്ചിരുന്നു. ഇതിന് പിന്നാലെയാണ് ഇഡി റെയ്ഡ് നടക്കുന്നത്. കഴിഞ്ഞ മാസം അനില് അംബാനിക്കെതിരെ നടപടിയെടുക്കുന്നതായി എസ്ബിഐ റിസര്വ് ബാങ്കിനെ അറിയിച്ചിരുന്നു. ബോംബെ സ്റ്റോക്ക് എക്സ്ചേഞ്ചിനെയും വിവരമറിയിച്ചിരുന്നു. റിലയന്സിന് ലഭിച്ച 31000 കോടി രൂപ മറ്റ് കമ്പനികള് ഉപയോഗിച്ച് അനില് അംബാനി ദുരുപയോഗം ചെയ്തുവെന്നായിരുന്നു അനില് അംബാനിക്കെതിരായ എസ്ബിഐയുടെ ആരോപണം.
