ന്യൂഡല്ഹി: ഡല്ഹിയില് വാഹനത്തിന്റെ മുന് സീറ്റ് നിഷേധിച്ചതില് പിതാവിനെ മകന് വെടിവെച്ചു കൊന്നു. സിഐഎസ്എഫില് നിന്ന് വിരമിച്ച സബ് ഇന്സ്പെക്ടറായ സുരേന്ദ്ര സിംഗാണ് (60) മരിച്ചത്. ഉത്തരാഖണ്ഡിലേക്ക് താമസം മാറുന്നതിനിടെ യാത്രക്ക് കുടുംബം വാടകയ്ക്കെടുത്ത വാഹനത്തില് മുന് സീറ്റിലിരിക്കാന് മകന് എത്തിയപ്പോള് പിതാവ് നിഷേധിച്ചതിനെ തുടര്ന്നാണ് കൊലപാതകം നടന്നത്. മകര് ദീപക്കാണ് സുരേന്ദ്രസിംഗിനു നേരെ നിറയൊഴിച്ചത്.
ദീപക്കിനെ സംഭവസ്ഥലത്ത് നിന്ന് തന്നെ അറസ്റ്റ് ചെയ്തു. കുറ്റകൃത്യത്തിന് ഉപയോഗിച്ച തോക്കും 11 വെടിയുണ്ടകളും കണ്ടെടുത്തതായും പൊലീസ് അറിയിച്ചു. വ്യാഴാഴ്ച രാത്രി 7.30 ഓടെ തിമാര്പൂരിലെ എംഎസ് ബ്ലോക്കിന് സമീപമാണ് സംഭവം നടന്നത്. പട്രോളിംഗ് നടത്തുകയായിരുന്ന പൊലീസ് വെടിയൊച്ച കേട്ട് സ്ഥലത്തേക്ക് എത്തിയപ്പോഴാണ് റോഡില് രക്തത്തില് കുളിച്ച് കിടക്കുന്ന സുരേന്ദ്രനെ കണ്ടെത്തിയത്. ഉടനെ തന്നെ എച്ച്ആര്എച്ച് ആശുപത്രിയില് എത്തിച്ചെങ്കിലും മരണം സംഭവിക്കുകയായിരുന്നു.വെടിയുണ്ട ഇടതു കവിളില് തുളച്ചുകയറിയതായും മുഖത്ത് ഒന്നിലധികം വെടിയുണ്ടകള് ഏറ്റതായും പൊലീസ് പറഞ്ഞു. പിതാവിന്റെ ലൈസന്സുള്ള തോക്ക് ഉപയോഗിച്ചാണ് വെടിവെച്ചതെന്നും പൊലീസ് പറഞ്ഞു.കൊലപാതകത്തില് കേസ് രജിസ്റ്റര് ചെയ്തിട്ടുണ്ടെന്നും കൂടുതല് അന്വേഷണം നടന്നുവരികയാണെന്നും പൊലീസ് അറിയിച്ചു.
