ഗുവാഹത്തി: അസമിലെ ബോംഗൈഗാവ് ജില്ലയിലുണ്ടായ വാഹനാപകടത്തിൽ അതിർത്തി രക്ഷാ സേനയിലെ (ബിഎസ്എഫ്) 32 ജവാന്മാർക്ക് പരിക്കേറ്റു. ജവാന്മാർ സഞ്ചരിച്ചിരുന്ന ട്രക്ക് നിയന്ത്രണം വിട്ട് റോഡരികിലെ കുഴിയിലേക്ക് മറിയുകയായിരുന്നു.

വ്യാഴാഴ്ച വൈകുന്നേരം ദേശീയപാത 31C-ൽ ദാങ്‌തോൽ പൊലീസ് സ്റ്റേഷൻ പരിധിയിലെ ബാൽഗിരി മേഖലയിലാണ് അപകടമുണ്ടായത്. ബിഎസ്എഫ് ജവാന്മാരുമായി പോവുകയായിരുന്ന ട്രക്കിന്റെ നിയന്ത്രണം ഡ്രൈവർക്ക് നഷ്ടപ്പെട്ടതാണ് അപകടത്തിന് കാരണമെന്നാണ് പ്രാഥമിക നിഗമനം.

അപകടവിവരം അറിഞ്ഞ ഉടൻ പോലീസും നാട്ടുകാരും സ്ഥലത്തെത്തി രക്ഷാപ്രവർത്തനം നടത്തി. പരിക്കേറ്റ 32 ജവാന്മാരെയും ബോംഗൈഗാവ് സിവിൽ ആശുപത്രിയിൽ പ്രവേശിപ്പിച്ചു. ഇവർക്ക് ആവശ്യമായ ചികിത്സ നൽകിയതായി അധികൃതർ അറിയിച്ചു. സംഭവത്തിൽ പൊലീസും സൈന്യവും അന്വേഷണം ആരംഭിച്ചിട്ടുണ്ട്. അപകടത്തിന്റെ കൃത്യമായ കാരണം കണ്ടെത്താനുള്ള നടപടികൾ തുടരുകയാണ്.