സിഡ്നി: ചരിത്ര നേട്ടത്തിലേക്ക് ഓസ്ട്രേലിയ. രാജ്യത്തിന്റെ സൈനിക മേധാവിയായി ലെഫ്റ്റനന്റ് ജനറൽ സൂസൻ കോയിൽ സ്ഥാനമേൽക്കാനിരിക്കുകയാണ്. ഇതോടെ ഈ സ്ഥാനത്ത് എത്തുന്ന ആദ്യ വനിതയായി കോയിൽ മാറും. ഓസ്ട്രേലിയൻ സൈന്യത്തിന്റെ 125 വർഷത്തെ ചരിത്രത്തിൽ ആദ്യമായാണ് ഒരു വനിത ഈ ഉയർന്ന പദവിയിൽ എത്തുന്നത്.
നിലവിൽ സംയുക്ത ശേഷികളുടെ മേധാവിയായ കോയിൽ, ഇനി ഓസ്ട്രേലിയൻ സൈന്യത്തിന്റെ തലവനായി ചുമതലയേൽക്കും. തിങ്കളാഴ്ച പ്രധാനമന്ത്രി ആന്റണി അൽബനീസ് പുതിയ സൈനിക നിയമനങ്ങൾ പ്രഖ്യാപിച്ചു. കോയിൽ ജൂലൈയിൽ ചുമതലയേൽക്കും.
പ്രതിരോധ സേനയുടെ മേധാവിയായി അഡ്മിറൽ ഡേവിഡ് ജോൺസ്റ്റൺ ന്റെ പകരക്കാരനായി വൈസ് അഡ്മിറൽ മാർക്ക് ഹാമണ്ട് നിയമിതനാകും. റിയർ അഡ്മിറൽ മാത്യു ബക്ക്ലി നാവികസേനാ മേധാവിയായി സ്ഥാനക്കയറ്റം ലഭിക്കും.
1987-ൽ ആർമി റിസർവ്സിൽ ചേർന്ന കോയിൽ വിവിധ കമാൻഡ് ചുമതലകളിൽ പ്രവർത്തിച്ചിട്ടുണ്ട്. ടാസ്ക് ഗ്രൂപ്പ് അഫ്ഗാനിസ്ഥാന്റെ കമാൻഡറായും 17-ാം സിഗ്നൽ റെജിമെന്റിന്റെ കമാൻഡിംഗ് ഓഫീസറായും സേവനം അനുഷ്ഠിച്ചിട്ടുണ്ട്. ലെഫ്റ്റനന്റ് ജനറൽ സ്റ്റുവർട്ട് ന് പകരമായാണ് അവർ ഈ പദവിയിൽ എത്തുന്നത്.
ഓസ്ട്രേലിയൻ സൈന്യത്തിൽ വനിതകളുടെ പങ്കാളിത്തം വർധിപ്പിക്കാനുള്ള ശ്രമങ്ങൾക്കിടെയാണ് ഈ നിയമനം. നിലവിൽ ഓസ്ട്രേലിയൻ പ്രതിരോധ സേനയുടെ ഉന്നത നേതൃത്വത്തിൽ 18.5% വനിതകളാണ്. 2030 ഓടെ ഇത് 25% ആക്കുക എന്നതാണ് ലക്ഷ്യം.
